مطبخ حواء . . . . في رمضان

من طرف Azza .M الأحد أغسطس 31, 2008 11:31 am

السلام عليكم ورحمة الله وبركاته

ما عارفة من وين خطرت لي الفكرة دي
بس اهي خطرت وان شاء الله تعجبكم وتنال رضاكم
الموضوع ده موجه لكل من يدخل المطبخ ليعد طعامه بنفسه مجرد مساعدة خفيفة في رمضان
سواء كان لحواء المسكينة اللي بتحتار كل يوم والتاني مع فطور رمضان وبتتعب
او كان لآدم الأعزب او البعيد عن عائلته -ده طبعا لو ما اتجه الى الأكل الجاهز- وقرر يقعد في البيت

يوميا هنا حكون معاكم . . .
طيلة ايام شهر رمضان المبارك طبعا بتيسير من الله
يعني ما ناوية اغيب عنكم بس لو حصل فالعذر منكم . . .

الجواب واضح من عنوانه : سوف تجدون هنا وصفات أكل شهية جديدة ومختلفة يوميا
ولكن لا أستطيع أن اعدكم بأن تكون جميعها اكلات سودانية شعبية . . .
يعني ممكن تكون متنوعة او عالمية كنوع من التغيير واللي عندو استفسار عن وصفة معينة ممكن نجتهد ونطلعها . . .

يعني حبة مني وحبة منكم والحال حيمشي . . . .

أعذروني كتبت الموضوع بالعامية عمدا عشان ناخد الحالة وحدة وندخل المطبخ سوا . . .

حاجة اخيرة اكيد حابة اسمع رأيكم في الفكرة عشان أعرف نمشي فيها واللا لأ ؟ ؟ ؟

وبرضه رأيكم في الوصفات اللي حتعملوها وتاكلوها أول بأول وزي ما قلته اللي عنده استفسار عن حاجة في المطبخ ما يتردد ؟ ؟ ؟

وكلو بإذن الله . . .
أعاننا الله وإياكم على الصيام وبلغنا أجر رمضان
اللهم لا تجعلنا ممن لا ينالون من صيامهم إلا الجوع والعطش
يارب يا كريم يا غفور يا رحيم يا من قلت في الحديث القدسي ( إلا الصوم فإنه لي وأنا أجزي به ) إجعل جزاءنا منه كل خير
يارب إغفر لنا ذنوبنا وتقبل طاعتنا واكتبنا عندك من المحسنين

من طرف كمال عوض الله الأحد أغسطس 31, 2008 11:50 am

برنامج جميل ونحن شيوخ السنة دي في العزوبية بس خلي برنامجك مع التراويح عشان برنامج اليوم نستفيد منه أول يوم في الصيام وطبعا آخر يوم يكون قبل آخر أيام رمضان وما تتركي لينا مجال خيار لننا سنقدم أسئلة وطلبات تحير إلهام

من طرف Azza .M الأحد أغسطس 31, 2008 12:04 pm

كمال عوض الله كتب:برنامج جميل ونحن شيوخ السنة دي في العزوبية بس خلي برنامجك مع التراويح عشان برنامج اليوم نستفيد منه أول يوم في الصيام وطبعا آخر يوم يكون قبل آخر أيام رمضان وما تتركي لينا مجال خيار لننا سنقدم أسئلة وطلبات تحير إلهام

حـاضر عمي كمال طلباتك أوامر . . .

بإذن الله نبدأ بعد تراويح الليلة . . . . وشكرا على التنبيه المهم . . . .

بس ده اجتهاد شخصي بعيدا عن أمي إلهام لكن برضه لو الأسئلة بتحير شديد بنطلب المساعدة . . . .

ولو في أي وقت كان عندك أكلة معينة أطلبها طوالي

من طرف صالحه ابراهيم الأحد أغسطس 31, 2008 4:58 pm

الاخت عزة مداخلاتك حلوة ومطبخ رمضان احلى بس لشيوخ العزابة ديل ابدى بالساهل ذى الشوربة وسلطة الزبادى صحيح انت ممتازة فى المطبخ بس فى بعض الاشياء لازم نغششك فيها انا والهام وياريت الاخوةالعزابةيطبقوا يوميا ونعرف رايئهم تانى يوم وتصموا وتفطروا على خير

من طرف Mohamed الأحد أغسطس 31, 2008 6:18 pm

نشكرك الاخت عزة كثيرا على هذه الفكرة الرائعة و التي جاءت في الوقت المناسب,
نخطط في رمضان و نفر قليل من الاصدقاء في اعداد "حلة رمضان",
وفعلا اشترينا الحلة و العدة و بقت المشكلة في الطبيخ!!!!
الملاح الوحيد البنعرف نعمله هو "ملاح بيض",
وطبعا ده ما بفطر صائم Evil or Very Mad

علشان كده الرجاء وصف الاكلات بالتفصيل "الملل", بما فيه المقادير بالملعقة, فترة النقع في النار, عدد كبايات المويه المضافة, البدائل المتاحة في حالة عدم توفر احدى المواد,
أي ان يكون الشرح على مستوى المبتدئين, ويا حبذا لو كان في شكل نقاط متسلسلة,
أكون شاكرا لو بدأ الشرح بالاكلات البلدية "السهلة", والتي يمكن ان تكون موادها متوفرة في أي بلد,مثال : ملاح البطاطس,...الخ

وبالتأكيد تختلف متطلبات الاعضاء ابتدائا من ربات البيوت و اللائي يحتجن الى اكلات جديدة و على مستوى عالٍ من الاحترافية, وصولا الى العزابة المبتدئين,و قد يكون التوفيق بين الفئات تحدي.

كما نرجو من أمهاتنا بالمنتدى معوانتك في المشروع : د. صالحة, مها محيسي, رشا والاخرين.

وبالتوفيق في المشروع

من طرف Azza .M الأحد أغسطس 31, 2008 6:26 pm

صالحه ابراهيم كتب:الاخت عزة مداخلاتك حلوة ومطبخ رمضان احلى بس لشيوخ العزابة ديل ابدى بالساهل ذى الشوربة وسلطة الزبادى صحيح انت ممتازة فى المطبخ بس فى بعض الاشياء لازم نغششك فيها انا والهام وياريت الاخوةالعزابةيطبقوا يوميا ونعرف رايئهم تانى يوم وتصموا وتفطروا على خير

الأخت صالحة لك جزيل الشكر . . . .
واذا رأيك ان نبدأ بالحاجات الخفيفة فلك هذا وأتمنى الجميع يستفيد . . . .
أما من ناحية التغشيش فدي حاجة مؤكدة إني ححتاج ليك إنتي وأمي عشان كده خليك معاي أول بأول وشكرا ليك مقدما . . . .

من طرف Azza .M الأحد أغسطس 31, 2008 6:42 pm

Mohamed كتب:نشكرك الاخت عزة كثيرا على هذه الفكرة الرائعة و التي جاءت في الوقت المناسب,
نخطط في رمضان و نفر قليل من الاصدقاء في اعداد "حلة رمضان",
وفعلا اشترينا الحلة و العدة و بقت المشكلة في الطبيخ!!!!
الملاح الوحيد البنعرف نعمله هو "ملاح بيض",
وطبعا ده ما بفطر صائم
علشان كده الرجاء وصف الاكلات بالتفصيل "الملل", بما فيه المقادير بالملعقة, فترة النقع في النار, عدد كبايات المويه المضافة, البدائل المتاحة في حالة عدم توفر احدى المواد,
أي ان يكون الشرح على مستوى المبتدئين, ويا حبذا لو كان في شكل نقاط متسلسلة,
أكون شاكرا لو بدأ الشرح بالاكلات البلدية "السهلة", والتي يمكن ان تكون موادها متوفرة في أي بلد,مثال : ملاح البطاطس,...الخ

وبالتأكيد تختلف متطلبات الاعضاء ابتدائا من ربات البيوت و اللائي يحتجن الى اكلات جديدة و على مستوى عالٍ من الاحترافية, وصولا الى العزابة المبتدئين,و قد يكون التوفيق بين الفئات تحدي.

كما نرجو من أمهاتنا بالمنتدى معوانتك في المشروع : د. صالحة, مها محيسي, رشا والاخرين.

وبالتوفيق في المشروع

لك كل التقدير الأخ / محمد
وقدر الإمكان ححاول أخلي الشرح حق مبتدئين
بس حكاية عدد كبايات الموية المضافة دي كلنا بنشتغلها بالنظر ولكن سنجتهد جميعا وبإذن الله النتيجة خير.

أما متطلبات الأعضاء فبالفعل ستكون متفاوتة ولكن من الممكن أن نبدأ بالتدريج وحدة وحدة مثلا بما إنو د.صالحة ذكرت سلطة الروب والشوربة وقمت أنت بذكر ملاح البطاطس فهذه هي وجبات الغد . . . . .

ما أعتقد إنو في حواء في المنتدى بتكون محتاجة أوصف ليها الوجبات دي بس ححاول إن يكون في وجبة للمحترفين كل فترة وفترة إن شاء الله . . .

من طرف Azza .M الأحد أغسطس 31, 2008 7:07 pm

بسم الله الرحمن الرحيم وبه نستعين . . :

حنبدأ من سلطة الروب ( سلطة الزبادي ) خفيفة ولذيذة
أكيد كلكم بتعرفو تعملوها ولكن ذكر فإن الذكرى تنفع المؤمنين . . . .

المقادير :

أربع أو خمس حبات خـيـار
حبة واحدة جـزر
نص حبة فلفل أخضر ( فلفل رومي )
علبتان زبادي
فص أو اثنين ثوم

البهارات حسب الرغبة :
ملح + رشة فلفل أسود + نعناع للزينة

الطريقة :
يقطع الخيار إلى أربع قطع طولية ثم إلى شرائح رفيعة.
نقوم ببشر الجزر. ( ممكن تقوموا بتقطيعه إلى قطع صغيرة لكن البشر أسهل وألذ )
يقطع الفلفل الأخضر إلى قطع صغيرة جدا
يهرس الثوم أو يقطع الى شرائح صغيرة جدا

يخفق الزبادي جيداً حتى يصبح متجانساً تماماً ثم نضيف إليه الثوم والملح والفلفل الأسود ،
ويخلط الجميع بشكل جيد.
نضيف شرائح الخيار إلى الخليط وكذلك الجزر المبشور وقطع الفلفل الأخضر ونقلب .

أخيرا تقدم السلطة باردة مع خصلات نعناع للزينة .
وبالهنا والشفا

من طرف Azza .M الأحد أغسطس 31, 2008 7:43 pm

وصفات الشوربة أكتر منها مافي . . . .
أنواع كثيرة وطرق مختلفة ومذاقات متعدده . . . .

إليكم بواحدة منها وهي :

شــــــــوربـــــــــة الــــشـــعــــيـــريـــة

المقادير:

نصف كاس رز مغسول ومنقوع
نصف الكاس كوسا مقطعة مكعبات
نصف الكاس جزر مقطع مكعبات
شعيرية
ثلاث ملاعق بقدونس مفروم
نصف الكاس بصل مكعبات
خمس كاسات ماء
ملعقة زيت
ملح
فلفل اسود
بهار مشكل

الطريقة:

- نضع كل من الرز والكوسا والجزر والبصل على النار
ونضيف الماء بمقدار ثلاث كاسات حتى ينضج تماما ويترك ليبرد. سنسميه الخليط .

كيف نعرف النضج ؟
قم بإدخال شوكة في أحد قطع الكوسا ستلاحظ أنها اصبحت لينة وقم بتذوق الرز ستشعر بأنه سهل المضغ ولين أيضا

- يوضع الخليط بالخلاط ويطحن جيدا حتى يصبح ناعما .
- في قاع القدر(الوعاء) نضع الزيت والبقدونس ثم نضيف اليه الخليط ويتبل بالملح والفلفل الاسود والبهار المشكل.
- يضاف كاسان ماء للخليط و الشعيرية ويترك علي نار هادئة حتى تستوي الشعيرية ثم تقدم وهي ساخنة

وبصحة وعافية . . .

من طرف Azza .M الأحد أغسطس 31, 2008 7:48 pm

طبعا للي ما عايز الجوطة دي كلها في حل بسيط جدا مغلفات شوربة ماجي أو كنور شوربة سريعة التحضير
وعندهم نكهات متعددة وخلف الكيس في وصفات شهية . . .

طريقة عمل الشوربة سريعة التحضير :
يفرغ محتوى الغلاف في أربع أكواب من الماء الساخن
يترك ليغلي ويحرك من حين لآخر
يغطى الوعاء ثم يترك على نار هادئة لمدة 5-8 دقائق

وبس ....

من طرف Azza .M الأحد أغسطس 31, 2008 9:08 pm

ملاح البطاطس :

المقادير :
كيلو بطاطس
نصف كيلو لحم
5 حبات طماطم أو صلصة الطماطم
ملح + رشة فلفل أسود + كسبرة + نصف ملعقة صغيرة قرفة + بهارات
زيت أو سمن
بصلتين متوسطتين
مــاء

الطــريــقة :
يغسل اللحم ويقطع . .
يوضع الزيت في الوعاء ويضاف البصل المقطع حتى يتغير لونه أي يصفر
يضاف اللحم للبصل والزيت ويقلب الجميع على النار حتى يحمر اللحم
نضيف البهارات المذكورة أعلاه جميعها
ثم يضاف البطاطس بعد غسله وتقطيعه إلى حلقات أو مربعات ويقلب سريعا
يضاف الماء بمقدار كافي يغطي كافة المقادير
أخيرا نضيف الطماطم بعد تقسيمه إلى أرباع أو صلصة الطماطم
يترك المزيج مغطى على نار هادئة حتى ينضج ويسبك .

زي ما قلنا كيف نعرف النضج ؟
نقوم بإدخال شوكة في أحد مربعات البطاطس ونتأكد من أنها أصبحت لينة .

ملاحظة : اذا نفذ الماء أو لاحظنا أنه اصبح قليل قبل تمام النضج نستطيع اضافة كمية أخرى منه على حسب الحاجة ولكن حذاري ان تكثرو حتى لا يفقد طعمه .

وبصحة وعافية

من طرف Magic_Money الأحد أغسطس 31, 2008 9:25 pm

شكرا لك شيف عزة على هذه الطبخات الرائعة وجعلها الله في ميزان حسناتك..

صناعة القراصة
طبعاً الفكرة جيدة, ولا أحسب أن حواء وحدها ستستأثر بالخبرات, أنا عزابي قديم, وعايز أوصف للعزابة صناعة القراصة لانها بتسند الصائم ولا يحتاج لسحور بعدها بإذن الله, المقادير حسب الجوعة يعني تخُت الدقيق علي قدر جوعتك وجوعة المعاك, خُت شوية ملح بس أوعك تحنضلو, كان دايرالقراصة خميرة أعمل خميرة بيرة, وكان دايرة فايرة وهشة خت شوية بيكنغ باودر (بالمناسبة أمهاتنا كن يسمينه حُكم بودر), بس أوعك تخت نشادرأو كربونات لأنهن بيشبهن البيكنغ باودر وتكون بوظت القراصة, يعني لازم تتأكد من محتويات العلب والبرطمانيات الفي المطبخ كويس. كب الموية ويكون كويس لو كانت دافية شوية, بعدين لخ العجين ولخ ولخ ولخ. خلي العجين لمدة نص ساعة لحدي ما يفور يعني لحدي ما زبدو يتقلّم ويطمح فوق الماعون. ولّع النار وخت الصاج وللّا الطوة فوق النار لحدي ما تسخن. كان داير القراصة رهيفة خلي عجينك رقيّق وكان دايرا (عشرة بوصة) خلي العجين تخين. لازم تعرفوا إنو القراصة بنجضوها بالجنبتين يعني بعد ما تنجض الجنبة التحت تقلبها بس أعمل حسابك أوعك تنجض ايدينك وتتحرّق شان ما تجي بعدين وتقول أنا ما قلت ليك. الطرقة الأولى مهمة جدا علشان بتوريك كان نارك حارة ولا لا وبتوريك كان عجينتك مناسبة ولا ما ملخوخة كويس. وأنا غير مسؤول عن أي إضطرابات في معدة أي عزابي. مع تمنياتي لكم بصيام مقبول وقراصة لذيذة.

من طرف Azza .M الأحد أغسطس 31, 2008 9:50 pm

Magic_Money كتب:شكرا لك شيف عزة على هذه الطبخات الرائعة وجعلها الله في ميزان حسناتك..

حلوة حكاية شيف عزة دي . . .

الطبخة بتكون رائعة لما تعملوها وتدونا رأيكم . . .

لك الشكر

من طرف Azza .M الأحد أغسطس 31, 2008 10:02 pm

عمر محمد أحمد صديق كتب:صناعة القراصة
طبعاً الفكرة جيدة, ولا أحسب أن حواء وحدها ستستأثر بالخبرات, أنا عزابي قديم, وعايز أوصف للعزابة صناعة القراصة لانها بتسند الصائم ولا يحتاج لسحور بعدها بإذن الله, المقادير حسب الجوعة يعني تخُت الدقيق علي قدر جوعتك وجوعة المعاك, خُت شوية ملح بس أوعك تحنضلو, كان دايرالقراصة خميرة أعمل خميرة بيرة, وكان دايرة فايرة وهشة خت شوية بيكنغ باودر (بالمناسبة أمهاتنا كن يسمينه حُكم بودر), بس أوعك تخت نشادر لأنو بيشبة البيكنغ باودر وتكون بوظت القراصة, يعني لازم تتأكد من محتويات العلب والبرطمانيات الفي المطبخ كويس. كب الموية ويكون كويس لو كانت دافية شوية, بعدين لخ العجين ولخ ولخ ولخ. خلي العجين لمدة نص ساعة لحدي ما يفور يعني لحدي ما زبدو يتقلّم ويطمح فوق الماعون. ولّع النار وخت الصاج وللّا الطوة فوق النار لحدي ما تسخن. كان داير القراصة رهيفة خلي عجينك رقيّق وكان دايرا (عشرة بوصة) خلي العجين تخين. لازم تعرفوا إنو القراصة بنجضوها بالجنبتين يعني بعد ما تنجض الجنبة التحت تقلبها بس أعمل حسابك أوعك تنجض ايدينك وتتحرّق شان ما تجي بعدين وتقول أنا ما قلت ليك. الطرقة الأولى مهمة جدا علشان بتوريك كان نارك حارة ولا لا وبتوريك كان عجينتك مناسبة ولا ما ملخوخة كويس. وأنا غير مسؤول عن أي إضطرابات في معدة أي عزابي. مع تمنياتي لكم بصيام مقبول وقراصة لذيذة.

عمي عمر /
طلعت خبـــيـــــر وشكلنا بالجد حنتعلم منك . . . .
و أبدا المطبخ ليس حكرا على حواء وحدها . . . .
لك كل التقدير .

قصدت الدعابة فقط وليس لي في المطبخ شأن, ولك التحية يا عزة وربنا يوفقك.

من طرف Azza .M الأحد أغسطس 31, 2008 10:20 pm

عمر محمد أحمد صديق كتب:قصدت الدعابة فقط وليس لي في المطبخ شأن, ولك التحية يا عزة وربنا يوفقك.

طمنتني لأني شلته هم . . .
فمن يتقن الوصفات بهذا الشكل يكون قد وضعني صفراً على الشمال في عالم المطبخ.
لك ولعائلتك التحية وتقبل الله منا ومنكم صالح الاعمال .

من طرف crash الإثنين سبتمبر 01, 2008 9:33 am

الأخت عزة ...
الفكرة رائعة والأروع تفاعل الاعضاء معها ..
ربنا يتقبل منك ومن الجميع صيامكم ..

من طرف Mohamed الإثنين سبتمبر 01, 2008 3:38 pm

شكرا لك جزيلا الاخت عزة على هذا الشرح الرائع والوافي للأكلات,
وللامام مع برنامج موائد رمضان cheers

وشكراجزيلا للعم عمر على القراصة الشهية,

ورمضان كريم

من طرف Azza .M الإثنين سبتمبر 01, 2008 5:42 pm

وها قد انقضى أول أيام شهر رمضان المبارك . . .
تقبل الله صيامنا ورزقنا من فضله . . . .

يطل شهر رمضان على العالم الإسلامي ليجتمع المسلمين في كل مكان على صيام هذا الشهر وقيامه،
ومع شهر رمضان المبارك تجتمع العائلة أو الأصدقاء حول السفر الرمضانية في جو من الألفة والمحبة.

لتتمتع وعائلتك وأصدقائك بإفطار لذيذ وصحي، احرص على أن تبدأ إفطارك بالبلح أو التمر، واتبع ذلك بطبق من الشوربة الدافئة مصحوبا بنوع من أنواع السلطات، واختر من بين الأطباق الرئيسية الكثيرة لتكتمل سفرتك. صياما مقبولا وإفطارا هنيئا إن شاء الله.

من طرف Azza .M الإثنين سبتمبر 01, 2008 7:12 pm

[ندعوك للتسجيل في المنتدى أو التعريف بنفسك لمعاينة هذا الرابط]

كان رسول الله صلى الله عليه وسلم إذا أفطر قال: "ذهب الظمأ وابتلت العروق، وثبت الأجر إن شاء الله " (حسن، رواه أبو داوود)

سلطة الخضار بالمايونيز . . .

المقادير :
حبتين بطاطس مسلوقه
حبتين طماطم
كوب بسله مسلوقه يعني ناضجه
حبه جزر مسلوقه
ملعقتين كبيرتين مايونيز اي نوع
ملعقه زيت زيتون للتزيين وقليل من الملح.

الطريقة:

تقشر البطاطاس وتقطع مكعبات وكذلك الطماطم وكذلك الجزرة ويجب ان تكون المكعبات المقطعه بنفس الحجم وتخلط معها البسله والملح ويضاف المايونيز ويخلط جيد جدا ثم يصب في اناءالتقديم ويزين بزيت الزيتون
وبالهنا

من طرف Azza .M الإثنين سبتمبر 01, 2008 7:42 pm

رز بالعدس والحمص(كبكبي)

الـمـقـاديـر:
3 كـوب رز (حبة طويلة)
ربع كوب زيت ذرة أو سمن
حبة كبيرة بصل، مفروم
4 فص ثوم، مهروس
2 قرن فلفل أخضر حار، مفروم
2 ملعقة صغيرة ملح
نصف ملعقة صغيرة فلفل اسود
واحد ونص ملعقة صغيرة كمون
ربع ملعقة صغيرة كركم
ثلاثة أرباع كوب عدس ( اللي لونه بني )
ثلاثة أرباع كوب حمص (كبكبي )
3 كوب مرق دجاج أو لحم ( المرق هو شوربة الدجاج أو اللحم )

الطــريــقة :
اولا : نغسل الرز مع تغيير الماء عدة مرات إلى أن يصبح الماء صافيا، نقوم بنقع الرز في ماء دافئ مملح لحوالي 30 دقيقة
ثانيا : نسخن الزيت في قدر متوسط الحجم ، ونضيف البصل والثوم، ونطبخ الى ان يصبح ذهبي اللون
ثالثا : نضيف الفلفل الحار، الملح، الفلفل الأسود، الكمون، الكركم، العدس والحمص( الكبكبي) ، نقلب على نار متوسطة لحوالي دقيقتين .
رابعا : نضيف كوبين من الماء ونطبخ على نار هادئة 10-15 دقيقة الى ان ينضج ويتشرب معظم السوائل
خامسا : نضيف المرق، ندعه يغلي بقوة ثم نضيف الرز، وندعه يغلي بقوة لمدة 2-3 دقيقة ثم نغطي القدر،
أخيرا نخفف النار ونتركه 20-25 دقيقة إلى ان ينضج الرز.

من طرف مها محيسي الثلاثاء سبتمبر 02, 2008 10:07 am

الشكر للإبنة عزة ، على الوصفات الجميلة واللذيذة ، بس حقو توصفي ليهم دمعة

لقراصة الاخ عمر محمد احمد ، وصفه للقراصة صحيح 100% ،،،،

من طرف Magic_Money الثلاثاء سبتمبر 02, 2008 11:01 am

والله يا عزة طلعتي شف بحق وحقيق الله يديك العافية انا قمته جربته مع انومي في البيت ما بتقصر..وشكراً ليك تاني.. Smile

من طرف Azza .M الثلاثاء سبتمبر 02, 2008 7:09 pm

مها محيسي كتب:الشكر للإبنة عزة ، على الوصفات الجميلة واللذيذة ، بس حقو توصفي ليهم دمعة

لقراصة الاخ عمر محمد احمد ، وصفه للقراصة صحيح 100% ،،،،

حاضر سوف أقوم بوصف دمعة للقراصة . . .

وياريت انت كمان تشاركينا بمهاراتك . . .

رمضان مبارك عليكم ولك كل الشكر والتقدير . . .

من طرف Azza .M الثلاثاء سبتمبر 02, 2008 7:12 pm

Magic_Money كتب:والله يا عزة طلعتي شف بحق وحقيق الله يديك العافية انا قمته جربته مع انومي في البيت ما بتقصر..وشكراً ليك تاني..

العفو يا أخي على شنو بس . . .

ان شاء اللي جربته عجبك . .

وشكرا ليك . .

من طرف Azza .M الثلاثاء سبتمبر 02, 2008 7:16 pm

crash كتب:الأخت عزة ...
الفكرة رائعة والأروع تفاعل الاعضاء معها ..
ربنا يتقبل منك ومن الجميع صيامكم ..

وأنت رشا أحد الأعضاء الرائعين . . .

تقبل الله منا ومنكم وياريت تشاركينا باللي بتعرفيه . . .

لك فائق الاحترام .

من طرف Azza .M الثلاثاء سبتمبر 02, 2008 7:20 pm

Mohamed كتب:شكرا لك جزيلا الاخت عزة على هذا الشرح الرائع والوافي للأكلات,
وللامام مع برنامج موائد رمضان

وشكراجزيلا للعم عمر على القراصة الشهية,

ورمضان كريم

العفو الأخ / محمد . . .

بس شكله برنامج موائد رمضان ده بالجد حلَ ليك معضلة كبيرة

إن شاء الله دايما

ورمضان مبارك

من طرف Azza .M الثلاثاء سبتمبر 02, 2008 7:45 pm

كفتة ملفوفة بالباذنجان

مقـاديـر الكفتة :

حبتين باذنجان
ملح
ملعقتين كبيرتين زيت
نصف كيلو لحم مفروم
1 بصل مفروم ناعم
2 ملعقة كبيرة بقدونس مفروم
1 فلفل أخضر مفروم ناعم
4/1 ملعقة صغيرة بهارات مطحونة
ملح وفلفل
2 ملعقة كبيرة دقيق
2 ملعقة كبيرة زيت نباتي

طـريقة الكـفتـة :

-يُقطع الباذنجان إلى شرائح بالطول، ويُرش بالملح ويُترك لمدة ساعة.
-يُشطف من الملح ويُعصر قليلاً.
-يُرص في صينية ويُدهن بالزيت ويُحمر بالفرن من الجانبين.
-يُخلط اللحم المفروم مع البصل والبقدونس والفلفل ويُعجن جيداُ وتُتبل بالبهارات والملح والفلفل.
-تُشكل الكفتة على هيئة أصابع. تُدحرج في الدقيق وتُنفض، ثم تُحمر في الزيت الساخن.
-تُرفع على منشفة ورقية.
-يُوضع إصبع الكفتة فوق شريحة الباذنجان وتُلف وتُرص في الصينية، بحيث يكون الجزء الملفوف في الأسفل حتى الانتهاء من الكمية.

مقاديـر الصلصة :

2/1 كوب معجون طماطم
1 كوب ماء
1 ملعقة كبيرة خل
ملح وفلفل

طـريـقـة الـصـلصة :

-تُخلط المقادير حتى يذوب معجون الطماطم وتُتبل وتصب فوق الباذنجان.
-يُخبز في فرن حرارته 350 درجة فهرنهيت لمدة 30 دقيقة.
-يُقدم دافئاً مع الأرز الأبيض أو شرائح الخبز المحمر.

من طرف Azza .M الثلاثاء سبتمبر 02, 2008 9:53 pm

شوربة الضان :

المقادير والطريقة سويا لسهولتها :
لحم ضان مع عظم يقطع قطع صغيرة نضيف إليه كمية كبيرة من الماء ويوضع على النار
ونضيف اليه : بصل + هبهان + قرفة + ثوم + ملح + كسبرة + فلفل

وتترك حتى ينضج اللحم ويمكن ان نضيف ماء اذا لزم الأمر .

-*من الممكن أن نصفي الشوربة ( يعني نعزلها عن اللحم )
ونضيف قليل من الفول السوداني وقليل من الرز
أو قليل من الشعيرية المكسرة قطعا صغيرة مع التقليب المستمر
حتى يصبح الطعم الذ والقوام متماسك أي اكثر كثافة .

-*ولمن يرغب في الأكل الصحي بإمكانه أن يضيف مجموعة
من قطع الخضار المشكلة قبل أو بعد التصفية .

وبصحة وعافية .

من طرف ابو الزعيم الأربعاء سبتمبر 03, 2008 9:42 pm

الاخت العزيزة عزة
لك التحية على جهودك ... وفكرتك حلوة
بس وين ملاح التقلية والروب ولا عاوزة زول يغششك
ربنا يوفقك
تحياتي لك ولافراد اسرتك الكريمة
وتصوموا وتفطروا على خير

من طرف محمد الامين الخميس سبتمبر 04, 2008 9:15 am

شكرا جزيلا عزة وربنا يوفقك .
لكن وين مختفية "! وين ملاح التقلية والروب!"

من طرف Azza .M الخميس سبتمبر 04, 2008 10:17 am

ابو الزعيم كتب:الاخت العزيزة عزة
لك التحية على جهودك ... وفكرتك حلوة
بس وين ملاح التقلية والروب ولا عاوزة زول يغششك
ربنا يوفقك
تحياتي لك ولافراد اسرتك الكريمة
وتصوموا وتفطروا على خير

لك كل الود والتقدير . . .

ليه الإحراجات دي بس يعني . . .

حيكونوا عندك قريب ان شاء الله . . .

وربنا يوفقنا أجمعين بإذن الله . . .

وتقبل الله منا ومنكم صالح الأعمال

من طرف Azza .M الخميس سبتمبر 04, 2008 10:26 am

محمد الامين كتب:شكرا جزيلا عزة وربنا يوفقك .
لكن وين مختفية "! وين ملاح التقلية والروب!"

العفو وربنا يوفق الجميع بإذنه تعالى . . .

بس انتوا مالكم مصرين كده . . .
متأكده كلكم عارفين طريقتهم كيف لكن حاااضر حكتبهم قريب . . .

بس ادوني زمن أغش !!!!

ياعزه قراصة عمك عمر دي مانشفت وماوصفتي ليها الدمعه اهاا أنا بوريكم يالعزابه كيف تعملوا الدمعه وهي قريبه من القطر قام عندكم يعني ممكن يكون بديل ليها
أولاً: تحضر بصلتين كبار فحل وتخت الزيت في النار بس مايكون كتير .
ثانياً: تقطع البصل وتضعو في الزيت وتقلبو لحدي مايصفر او يبقى ذهبي .
ثالثاً: تضع مويه وملح حسب الرغبه بس المويه ماتكون كتيره يعني زي كوزين كدا وتتركه يغلي لمدة ربع ساعه .
رابعاً: تخلط الطماطم أو لو ماعندك صلصه وتتركها جانباً .
خامساً: عندك طبعاً اللحمه مقطعه أو دجاج تصبه على البصل في الحله وتقفل عليه وتتركه يغلي لمدة 20 دقيقه .
سادساً: تصب الصلصه أو الطماطم وتحرك البصله عشان تذوب مع وضع البهارات زي كزبره وبعدين شوية قرفه وهبهان مسحون والشطه حسب الرغبه .
سابعاً: بعد كدا سوف تجد شبه مسبكه تضع عليها الثوم المسحون وتتركها في نار هادئه لمدة 10 دقايق وبعد كدا بالهناء والشفاء .

عزه أنا شايفه الجماعه ديل ضايقوك شديد في ملاح الروب والتقليه
اهو انا بوصف ليهم ملاح الروب أو النعيميه مع العصيده
العصيده :ـ
بالنسبه للناس الماعندهم دقيق ذره ممكن استبداله بالروب والطحين العادي حق القمح . تحضر كاسه زبادي أو روب وتضعه على كاسة ماء في النار بعد ان يغلي . تعجن كاسه طحين في الماء وتصفيه وتضعه على الماء البغلي وتحرك بسرعه بالكنش ولو ماعندك بمضرب البيض لحي مايتماسك ويفك من الحله وبعد كدا تضعو في القالب العندك وتتركو عشان تعمل ملاح الروب .
ملاح الروب :ـ
تحضر بصلتين تقطعها وتضعها في الزيت حتى تحمر وتأخذها من الزيت وتضعها في الخلاط معها حبتين طماطم حمراء وشوية موية وترجعها الحله ثم تضع معها شوية لحمه يعني زي ربع كيلو مفروم ولو ماحمرت تضيف شوية صلصه والبهارات جميعاً . تضع في الخلاط الروب مثلاً ثلاثه كاسات ومعها ملعقة فول مسحون و2 ملعقة دقيق ولو عندك ويكه فبها تضع ملعقه منها ولو ماعندك ممكن تنشف باميه عاديه وتسحنها قبل كم يوم من هذا وتأخذ منها ملعقه وبعد الخلط تصبه في الحله على اللحمه والبصل المخلوط ثم تحرك لمدة 10 دقايق أو ربع ساعه وتجده تماسك والثوم حسب الرغبه وبالهناء والشفاء وإنشاء الله تكون عجبتكم

من طرف Magic_Money الخميس سبتمبر 04, 2008 12:04 pm

شكرا للعمة صالحة ..والله انا قمتشته اشوبرته ..وسويت ملاح روب فد مره طبعا دي اكبر تهور عملتو في حياتي..صحيح انو طلع فيهو حاجات غريبة لأني قمتة ألفته شوي عملته فيها شيف..وزول غير اكلو مافي..لكن زي ما بقول: (يخسر الإنسان عندما يفقد الأمل )وانا لسه ما فقدته الأمل وبحاول تاني لمن ازبطه انشاء لله..وشكراً Very Happy

من طرف Azza .M الخميس سبتمبر 04, 2008 10:40 pm

الأخت الدكتورة صالحة . . .جزيتي خيرا عزيزتي . . .

بالجد ما قصرتي معانا أبداً . . . ووريتينا الشغل على أصوله

من طرف ابو الزعيم الخميس سبتمبر 04, 2008 10:50 pm

د. صالحة تحياتي ورمضان كريم
مشكورة على هذه المعلومات .. وخلي الشباب يتعلم
وكمان العزابة ديل ممكن يجي يوم ويحتاجو لي هذه النصايح
اما اخوك وبلا فخر اسطة قديم ومفتح في عملية الطبيخ دي
لكن بعد الواحد استقر مع عياله ورجع من الغربة الدلع حصل
واخوك عامل حميل ذي الما بعرف يطبخ
الله يديكم العافية وتصوموا وتفطروا على خير

من طرف محمد الامين السبت سبتمبر 06, 2008 9:39 am

شكرا د . صالحة على المعلومات
لكن مطبخ رمضان مافيهو عصيرات ولا حلويات وحاجات تاني سودانية او غير سودانية .. مع خالص الشكر

من طرف الرشيد حسين الأحد سبتمبر 07, 2008 11:47 am

فكرة جميلة عــــزة
وجهــــــد مقدر

من طرف Magic_Money الأحد سبتمبر 07, 2008 2:02 pm

وينك طبغاتك يا عزة خلصت ولا شنو..؟؟