احمد وحاج احمد

خرج الهلال بعد ان اضاء شمعة الامل ومع مرور الدقائق كبرت الشمعة حتى اضاءت لنا شارع العرضة وسرح الخيال وبدات الصور تتراى لي ....شارع العرضة يهتز طربا ....وصور اخرى للمحبين في قريتي على متن دفار ابو امنة وهم يستعدون للمسيرات الصاخبة وفجاة هبت رياح عاتية اطفات شمعتنا وعدنا للحزن النبيل الله يجازيك يا البرير انت وغارزيتو سودتو علينا الجمعه الجميلة واجلنا الفرح ليوم السبت
يوم السبت وما ادراك ما يوم السبت ....سبت جميل وضئ فنان رائع سبت ولا كل السبتات
كنت اجلس على نار والدقائق تمر وانا زول واضح لا بلف ولا بدور كنت بشجع الانجولي وكمان هم ساعدوني لابسين ليك البلو بسم الله ما شاء الله ويقدلو في شوارع دفاعات المريخ وقال ليك كدة لاعب من لعيبتهم هو اسمو منو يا ابو يوسف ؟ بشتن ليك المريخاب بشتنة وقال كدة جاب القون بالله الاستاد صبت فيه مطرة والله متعة المتعة
اها وبعداك الخاين طبعا جدع باص للراكوبة والراكوبة جدعت باص للود راجي وجابو قون بيني وبينكم مسكتني ام هلا هلا وغلبتني القعدة خفت القون يجي اها جات رصاصة الرحمة بالله خلت ليك اكرم يتشابا بعداك يا دوب انا ارتحتا واطلقت العنان لافراحي التي سالت ملت الدنيا كلها
يا ضلنا المرسوم على رمل المسافة وشاكي من طول الطريق
احمد لحق حاج احمد والامل فيك يا احمد الحاج عشان ترفعوا اسم الوطن ونحن معكم قلبا وقالبا لانكم بتلعبوا باسم السودان والوطنية تحتم علينا ان نشد من ازركم وانتم الابطال الذين اذاقوا ضلنا ويلات الخسارة
اللهم انصر نمور دار جعل

صديقى يسرى الجعلى ليك التحية ياراجل ياراقى والله افتقدك بشدة وافتقد مرافقتك لحضور مبارياتنا الهوان ..........
خرج الهلال والمريخ خاليا الوفاض ولم تكن هنالك مفاجأت لأن المستوى كان ينذر بذلك بالرغم من ان الهلال كان غاب قوسين او ادنى وبالرغم من ذلك كانت بالنفس حسرة ليس بتحيز الحكم الزامبى لأن حال التحكيم داخل ادغال افريقيا اسوأ بكثير وكلكم شاهد عيان بل لأن الهلال لم يكن هو الهلال لم يكن حامى هو ذاك الموجهه ولم يكن قلب الدفاع هو قلب الاسد وقس على ذلك وان كانت لى وقفة عند مهند وعمر لأنهما المعنيان ببث الروح والحماس وسط لعيبة الازرق الا انهما كانا الاسوأ على الاطلاق لعب مهند وكأنه يلعب فى الحوراى ولعب عمر وكأنه يلعب بالجريف هل هذا هو الهلال الذى عرفنا لا اود ان اتحدث اكثر .... وكفى
اما عن المريخ فهو افضل حال من الهلال سواء كان ذلك على مستوى الاسقرار الادارى او لاعبى الفريق المريخ كان اقرب من الهلال ولكن ايضا لم يكن الكثيرين من جمهور المريخ متفائل بذهاب الفريق بعيدًاً فى هذه البطولة
من وجهة نظرى ياجعلوتة ارى الدواء فى الاتى :
_ شطب جميع لاعبى الفريقين دون استثناء.
_ تسجيل لاعبين صغار السن بمواصفات اولها ان يكون اللاعب ممن اصحاب العقول الفذة لا امثال بله جابر وعبداللطيف بوى
_ التوقف عن المشاركة فى البطولات الخارجية لمدة ثلالث سنوات لترتيب الاوضاع الداخلية
وعلينا ان نستفيد من غيرنا بتبديل جلد فرقناحتى نلحق بركب فرق القارة ودونكم اثيوبيا استفادت من الدروس وتحسست الطريق وهنالك اندية عريقة ترتب فى اوضاعها للظور بمستوى مميز ومشرف امثال الاشانتى كوتوكو الغانى واسيك العاجى وكثير من الفرق زائعة الصيت .

ولينا رجعة