يا مغسل بدموع الحور( من شعر البطانة):

من طرف محمد الامين الخميس يوليو 24, 2008 8:17 am

البارح بريقات الهجوع شاقني
لاشافن بعيد لكن خلاص عاقني
شوف رهيوات قلت أكان شالني
بالهلكوت رمني وتاني ما لاقني

**************
حليل الفريق وحليل رفاقة الخوه
وطال بينا الفراق لا حولا عاد ولا قوة
ليه ياقسمة فى الدنيا العبد شن سوا
بالنار الوحيد فى قلبو نارو إتكوه

*************
حليل الفريق وحليل نواحي بلدنا
وحار صوت الفراق جرح قلوبنا جلدنا
لكناه الصبر فوق مرتنا إتقلبنا
حليل البغمر كرفو يوم قالدنا

**************
ياما حصل حبيتو
وما حصل حباني
حبيتكم حب يؤجج ضلعاني
سجلت بالفحم فى الحيطاني

*************
وما في داعي تقفلي البيباني
مثل الزريبة تموج بالحملان
ومادام ابت ريدتنا بالاحسان
و توزع البسمات بالمجاني
**************
كتير الناس تقول مجنون هو ما مجنون
دا شيتن جوه فى قليبو
ازاول ليهو حامي النوم
اساهر لي هوايد الليل

*************
ابرم فى سبيب راسو
واحت فى الشدر والعليف
وقت هبت نسايم الصيف
امشي حفيان اباري القيف

*************
بهائم الحله تتوجه
عشان تاكل المحتوت
إعاين ليها واتبسم
وما يحاجيها إمشي افوت

*************
حشاه ضمر ... تقول عجلاً مكدن
فى الوتد مربوط
مغسل بدموع الحور

من طرف محمد الامين السبت يوليو 26, 2008 8:52 am

2/ساكت بس
اتهمهت بالكلمة
واتراجعت مليون مرة
بخاف المحنة والزرة
قليبي خفيف
اكان قالت صباح الخير

******
وعاد يوم داك ......
طردت الخوف ممن قلبي
وسألت السمحة ... مخطوبة
سمعت قولت لا....

*****
تقول بندق
وقلبي الماسكو بين ايدي
قنب ادق
حلقي نشف وريقي يطق
اتململت فى القعدة
وبدور امرق
كان قالت لا....

*****
سألتني ليه .....
كلامي الراصو طار مني
واتقفل خشمي واتربس
قريت الحمدو عشرين مرة
حتي قدرت اتنفس

*****
واخوك قال ليها ساكت بس
اتاري الخوف ما بندس
رصيت نعلاتي بالقلبة
وبديت البس

*****
وعادت السمحة قالت قر
وانا الولهان مرقت انجر
تقول غرقان مرق فى البر
حاولت أقول باي باي
لقيت خشمي بي كماشة ما بنفر

يا مغسل بدموع الحور( من شعر البطانة):

يا مغسل بدموع الحور( من شعر البطانة):

رد: يا مغسل بدموع الحور( من شعر البطانة):