قصيدة حلوة

المطرة
عاطف خيري
لما السحاب يتكوم
فوق السما واتلملم
في لحظة يتكلم
في وجعة يتألم
صوت الرعد دوًى
وطلعنا فوق الدرب صايحين
يا هبوب هبي ويامطرة صبي
المطرة وكتين تنقط
تتطلع الطفلة وتنطط
تمسح الواطة وتشخبط
ونبني تاني بيوت كتيرة
للمساكين والغلابة
والمسافرين الضهابة
الببيتو الليل غطاهم
السما وضل السحابة
جارين وفرحانين
جارين وماعارفين
انو السحاب ببكي
من شوقو للامطار
دمعت عويناتو
ما عندو دار يشتاق لملاقاتو
رسل جواب للنيل
والطابعة دمعاتو
يشكيلو من الحال
والغربة واهاتو
جارين وفرحانين
جارين وماعارفين
ليه القطر بندم
والناس تودع ليه
ليه القماري تنوح
والعين بتدمع ليه
ليه الشمس بتغيب
والكون تغطي وشيشو
يا ريت نعود اطفال
لا نعرف الاحزان
لا نحمل الاوزار
والعب معاك في الطين
والقالي تعريفة
نجريبا للدكان
وتقولي دايرة لبان
واقول كمان نعناع
ونقسم النعناع
لي كل زول في الحي
للساكن الاكواخ
والعندو بيت دورين
لا نفرز الغنيان من الشقي المسكين
واهلك ينادولك
يابت تعالي البيت
ما تجولي بالحلة
خلي اللعب في الطين
فستانك اتبلً
وتقومي زعلانة
والمطرة فوق خديك
زي لوحة مزدانة
ورزازا فوق حاجبيك
وارجع براي البيت
ويقولولي جاي ليي ؟؟؟؟
ما كنت تتغدا
جايينا كلك طين
ارجع مكان ما جيت
واتمنى في سري
ارجع معاك البيت
ارقد كمان وابيت
نشرب كبابي الشاي
ونقرا القصص بالليل
الارنب الطيبة
والارض والبقرة
وننوم غطانا الشوق
لي بكرة والمطرة...

القصيدة رائعة وكلمة حلوة قليلة عليها ...

لن تباعدنا ايها السفر نلتقي يوما وفي الدنيا قمر ...

شكرا crash على المتابعة وابداء رايك

اشكرك اخي محمد الامين

الاخت الاء ...
عاطف خيري من الشباب الذين تركوا بصمة واضحة في مجال الشعر ... وذلك بمفردته السهلة وعميقة ( السهل الممتنع )
او السهل الممتع ... شكراً جزيلاً لك انقلك لنا هذه الدرة من درر عاطف .. ونحن في انتظار المزيد
واسمحي لي ان اهديك وبقية الاعضاء قصيدة للشاعر معز عمر بخيت



أنيقة ومذهلة
*****


يا بت أنيقة ومذهلة

يا وردة في حقل الفرح

بيها النضارة مكملة

***

يا لمحة الشوق والهيام

يا أحلى من معنى الحلا

يا عقد لولي من النجوم

يا عالية فوق سقف العلا..

***

لو تزعلي الدنيا بتموت

ما انتي زعلك بكتلا

ما انتي حزنك ببقى نار

يحرق سمانا ويشعلا

***

ما تزعلي وما تحزنى

يا أندى غيمة مظللة

خلينا بس نتهنا بيك

وين جنة غيرك ندخلا

***

يا رايعة جد يا مذهلة

يا غيمة في مطر الحنين

يا شوق ملانا وما اتملا.

شكرا ابو الزعيم على القصيدة الحلوة

حاجة الاء والمطرة شكرا على القصيدة الرائعة ايمان الصادق الامين

والله يا الوية القصيدة حلوة بالجد و اختيارك جميل جدااهنك عليهوو الي الامام دوما

شكرا امين على ابداء رايك وكلك زوق

والله يا ايمان الصادق ليك الشكر وخليك في تواصل...............

اخيرا رديتى يالولو

ايمان الصادق

انا والله عايزة ارد لكن بالجد مشغولة