الطمبور(ديوان المبدع ابراهيم ابنعوف)

من طرف عائد النقدابي الخميس أغسطس 05, 2010 11:46 pm

أمنية راحل

مناي كل لحظة أشوفك .. مناى شوفتـك كـل ساعـة

فراقك بكاهـو قلبـى .. وكتـل فـى نفسـى القناعـة

أطرى يومة ودعتـك الله .. وعيونـك باكـى دمَّاعـة

غلبنى أقلدك وأوادعـك .. حمتنـى عيـون الجماعـة

حسيت بى كبدى واقعى .. اتغـرس سكيـن وقطاعـة

وأنا أتيتم بى فراقـك .. يتـم شافعـاً فـى الرضاعـة

زمانى الصبق الأمانى ..غدرنى وفـات بـى سراعـا

مالو كان إتأخر شوى.. هـو عـارف الفرقـة لواعـة

داير أعاين أمتع عيونـى ..عيونـى وراك وا ضياعـا

دى ما آخر نظرة لى فـى الوجيـه الكاسيـة الوداعـة

كتير سرحت بى الوساوس همومى غرقـت فـى قاعـا

بقيت بين أقعـد وأسافـر .. شكـوك نفسـى واقتناعـا

إن قعدت الناس مابتريح .. وفراقـك مالـو إستطاعـة

غايتو قسمة وقسموها لينا آب تردهـا كـف الضراعـة

وحاتك مجبـور أفـارق .. فراقـاً مـو بـى قناعـة

وأبيع روحى أنا ليكى وأمشى ومنو القبلى أنا روحو باعا

مالكاها ومالكى ساسا .. السمع ليكـى إنـت والطاعـة

ربيعا أنتى وعز شبابا .. وحياتـا بـلاك شـن نفاعـا

قدر مـا تفـرِّحْ .. تبكـى .. حقيقـة الدنيـا خداعـة

تلمَّـك لامـن توالـف .. وتفرقـك فـى أى سـاعـة

تخبى أقدارا فى أياما .. وتلـف حولـك بـى براعـة

تجيب تديك مـن عذابـا .. وشقاهـا البعقـب متاعـا

وداعـاً ثمـرة فـؤادى .. ودعتـك أميـن الـوداعـة

وحاتـك مابنسـى كلمـة العصيـر شاقيـن الزراعـة

ولا بتحلالى غير سيرتك .. وكت نحكى أنا والرباعـة

إن هدولى الجنة بى حورا .. ألقى فيكى نفيستى طماعة

من طرف عائد النقدابي الجمعة أغسطس 06, 2010 12:01 am

التحدى

نومي اصحي على غرورك معاك لازال التحدي
وآي طريق يوصل لي قليبك منى سدى
ده لو كان تلقيهو صبرا يماتل صبري وتمدي
صبري عليك أنى صابر تشققي قليبي وتلحي
هيا ابعدى كل العواطف واشاورك من وين ضرورى
لاتزيدى مواجعك على لا ترجعى فرحى وسرورى
فى الحالتين راضى عنك تنصفى او كان تجورى
وسمح حكمك زى سماحتك وبرضو قسيمة الله سمحى
اوعى تغرك سماحتك سماحه الغنا يانى سيدها
سماح يبلى مع الليالىيبقى سماح القصيدة
اخلخل بيها المشاعر واتوها ازمان عديده
وفكرتها انتى وبيانها وكدى اقدرى من خاطرى زحى
او انفذى كل ما اسطتعتى مداركى ابعد من سماء كى
وجوبى اراضيكى تلقى جنونى تهاجر وراكى
اسلكى كل العوالم خيالى بيدرك مداكى
انا الكون المحتويك يا قصيده فى الجوف توحى
احبك احبك ويسعدنى حبك وقت يبقى حلوهو مرو
احبك غلبا يقطع والملمو فى الجوف واصرو
انا المجنون البيعشق مرامى الريد التضرو
قبلان بى ضررى راضى منو القال ليك ضحى
شيشك بى بشيشك اصحى صحاك ونومك بيشفق
وجيبى جفاك وازرعيهو قصاد الحن المدفق
كفاية اشوف فى عيونك تغنى الدنيا وتصفق
بعد داك نومى اطمينى ولومك فى خاطرى ممحى
..

الطمبور(ديوان المبدع ابراهيم ابنعوف)

الطمبور(ديوان المبدع ابراهيم ابنعوف)

رد: الطمبور(ديوان المبدع ابراهيم ابنعوف)