احاجي سودانية - في بيتنا حرامي !!!
صفحة 1 من اصل 1
احاجي سودانية - في بيتنا حرامي !!!
في بيتنا حرامي!!!
حجيتكم ما بجيتكم خيرا جانا وجاكم!!!
حبوبتي قالت لي يا فيفيد . . الحرامية ديل خوافين . . كان شفت ليك حرامي . . أعطس . . و فرفر و اتمغى فوق سريرك . . و كان لقيت ليك طريقة تتشهّق . . اتشهّق بي راحتك . . الحرامي بقول الزولدا صاحي و بقوم جاري منك صوف . . بس أوعك تسرخ يا فيفيد . . كان سرخت الله قال بيقولك . . المرة الجاية بجيك و يكتفك فوق سريك . . و لسانك دا يسلو ليك من لغلوغو . . كلام حبوبتي دا كيفني و بسطني طب . . و شحدت الله يقوم يجينا حرامي عشان أفرفر واتمغى ليهو و اتشهّق أمامه فارداً خشمي على أوسع أبوابه . . و أشوفو و هو قايم صوف قدام عيوني . . داك الليلة راقد جمب حبوبتي . . صحيت باليل . . علي زنقة بول . . قلت أمشي أفك الداهية دا و انحلا منو قبل يكتر و يعمل لي غلبة . . و اجي اتم نومتي اللذيذونية دي بي راحتي . . الساعة الداير أقوم فيها أمشي المستراح . . أشوف بيرقراق البطانية . . دهمة شيء مكومة فوق راس الحيطة و قاعدة تعاين لي بي فوق الحيطة . . في اللوال كضبت روحي . . قلت أنا قطع شك وهمان ساكت . . عيلا وكتين عركت عويناتي . . الدهمة الفوق الحيطة دي بقت لي كبيرة . .دهمة حرامي . . المطرة صبت فوقي من الخوفة . . و جسمي اتماص كلو كلو بقة زي العجين . . و عرقت من صوف راسي ليكرعي . . و فكرة مشي المستراح طارت لي فوق راسي . . قلت خلاس دا حرامي . . جاء يسرقنا و يبشتنا . . قهرتك بي سيدي الحسن . . لبدت و قطعت الحركة و اتكومتا في نص العنقريب . . و أنا أرجف من الحمى . . و قعدت أعاين للحرامي دا بي رقراق البطانية . . يا السييييد الحسن الليلة تحلني من الورطة دي . . اظكرت كلام حبوبتي . . و شحدت الله الحرامي دا يكون ذي حرامي حبوبتي الخواف . . و اتظكرتا و صيتها و قلت لازمن أفرفر و أعطس و اتمغى . . عشان أوري الحرامي دا أني صاحي . . شلت جسمي فووووق . . وهردلب رميتو في بطن العنقريب . . و قمت اتشهقت و اتنخمت و تف بزقت . . لكن انت ياالحرامي أبيت تمشي من فوق للحيطة . . حرامي عنيد و عينو قوية ينغرز فيها عود كبريت . . حرامية الزمن دا ما زي حرامية زمن حبوبتي . . منهم جفلة . . وكتي الانقلبتا فيهو و اتنخمت و بزقت . . التقول عرفني صاحي . . الحرامي دا قبل يمين و قبل شمال . . و قعد يأشر . . بعد شوية ظهر معاهو رفيقو . . بقوا اتنين . . دهمتين فوق الحيطة . . الدهمة قدر ركيزة الباب . . الفيني كملت طب . . و من الخوفة لامن انزلق مني صوت بي تحت . . و قلت الحرامي البجيب زميلو دا عيلا ناوي علي شر . . محاسن جارتنا . . داك الليلة الحرامية جوها لقوها نايمة . . سمعت الكركبة . . صحت من النوم . . قالتليهم سجمي انتو حرامية ؟؟؟ . . قالوا ليها آآآآآآي . . قالت ليهم زحوا لي كدي خلوني النسرخ . . الساعة الدايرة تسرخ فيها الحراااامي . . الحرامية ديل مسكوها من عراقيب كرعيها . . و اتشلبوها . . و فنننننننن فنوها بي فوق الحيطة. . الليلة الله يكفينا شر الحرامية البجدعوا الناس بي فوق الحيطة . . أنا ضعيفوني . . و ما فيني حيل . . كان جدعوني بي فوق الحيطة عيلا أموت ليهن و أبقى ليهن في رقبتن . . الحويج سيد البقالة الحرامية زمان جو يسرقوا بيتو . . وكت ما لقوا عندو شيء يسرقوهوا . . اتصرفوا بدل يرجعو ايد وراء و ايد قدام . . ملصوا سراويلن و قعدو في الواطة و عملوا ليهو الكاكا في نص أوضتو . . و رجعوا صادين . . شاحدك و ناضرك يا مالك روحي . . الحرامية ديل كان تلبوا الحيطة دي يبقوا زي الحرامية الجو للحويج سيد البقالة . . يدخلوا و يعملوا العملوهو في أوضة الحويج ويرجعوا صادين بي دربهم . . عافي ليهن عفوالله و الرسول . . أحسن من يفنوني بي فوق الحيطة و أموت ليهن في يدهن . . وكت الحرامية ديل أبو يخافوا و أبو يزحوا من الحيطة . . قررت أقوم أنقلب و اتمغى و أعطس و انكرش ليهم مرة تاني . . يمكن المرة الفاتت دي ما شافوني . . لكن وكت اتمغيت وانكرشت و قحقحتا للمرة التانية . . انتو يا الحرامية قوموا و قبلوا يمين و قبلواشمال و أقعدوا أشروا . . جاهم واحد تالت . . بقوا تلاتة . . نعلت اليوم الخالاني أسمع فيهو كلام حبوبتي . . و قلت كان اتمغيت و انكرشت تاني . . الحيطة دي حا تتملي حرامية . . كان من قبيل سرخت الحرااامي كان انحليت . . لكن هسي السرخة كيفن بعد مابقوا تلاتة . . و يمكن يكون في شيء تاني لابد تحت الحيطة . . و حبوبتي الراقدة جمبي دي . . بتضحك علي . . و فضيحتي بتكون بي جلاجل . . في النهاية قررت أن أسرخ و كان حبوبتي قالت لي سرخت لي شنو . . أقول ليها حلمان . . و جاني أب كباس . . لملمت حيلي و قوتي و سرخت بي صوت مقروش . . الحرااااااامي . . حبوبتي صحت من نومها مخلوعة . . مالك يا فيفيد . . قعدت أأشر ليها للحرامية فوق راس الحيطة . . قلت ليها . . الحرامية يا حبوبة . . قالت لي و هي تضحك بي طول حسها . . انت و همان يا فيفيد ؟؟؟ . . ديل جدادات عشة أختي نايمات فوق راس الحيطة.
حجيتكم ما بجيتكم خيرا جانا وجاكم!!!
حبوبتي قالت لي يا فيفيد . . الحرامية ديل خوافين . . كان شفت ليك حرامي . . أعطس . . و فرفر و اتمغى فوق سريرك . . و كان لقيت ليك طريقة تتشهّق . . اتشهّق بي راحتك . . الحرامي بقول الزولدا صاحي و بقوم جاري منك صوف . . بس أوعك تسرخ يا فيفيد . . كان سرخت الله قال بيقولك . . المرة الجاية بجيك و يكتفك فوق سريك . . و لسانك دا يسلو ليك من لغلوغو . . كلام حبوبتي دا كيفني و بسطني طب . . و شحدت الله يقوم يجينا حرامي عشان أفرفر واتمغى ليهو و اتشهّق أمامه فارداً خشمي على أوسع أبوابه . . و أشوفو و هو قايم صوف قدام عيوني . . داك الليلة راقد جمب حبوبتي . . صحيت باليل . . علي زنقة بول . . قلت أمشي أفك الداهية دا و انحلا منو قبل يكتر و يعمل لي غلبة . . و اجي اتم نومتي اللذيذونية دي بي راحتي . . الساعة الداير أقوم فيها أمشي المستراح . . أشوف بيرقراق البطانية . . دهمة شيء مكومة فوق راس الحيطة و قاعدة تعاين لي بي فوق الحيطة . . في اللوال كضبت روحي . . قلت أنا قطع شك وهمان ساكت . . عيلا وكتين عركت عويناتي . . الدهمة الفوق الحيطة دي بقت لي كبيرة . .دهمة حرامي . . المطرة صبت فوقي من الخوفة . . و جسمي اتماص كلو كلو بقة زي العجين . . و عرقت من صوف راسي ليكرعي . . و فكرة مشي المستراح طارت لي فوق راسي . . قلت خلاس دا حرامي . . جاء يسرقنا و يبشتنا . . قهرتك بي سيدي الحسن . . لبدت و قطعت الحركة و اتكومتا في نص العنقريب . . و أنا أرجف من الحمى . . و قعدت أعاين للحرامي دا بي رقراق البطانية . . يا السييييد الحسن الليلة تحلني من الورطة دي . . اظكرت كلام حبوبتي . . و شحدت الله الحرامي دا يكون ذي حرامي حبوبتي الخواف . . و اتظكرتا و صيتها و قلت لازمن أفرفر و أعطس و اتمغى . . عشان أوري الحرامي دا أني صاحي . . شلت جسمي فووووق . . وهردلب رميتو في بطن العنقريب . . و قمت اتشهقت و اتنخمت و تف بزقت . . لكن انت ياالحرامي أبيت تمشي من فوق للحيطة . . حرامي عنيد و عينو قوية ينغرز فيها عود كبريت . . حرامية الزمن دا ما زي حرامية زمن حبوبتي . . منهم جفلة . . وكتي الانقلبتا فيهو و اتنخمت و بزقت . . التقول عرفني صاحي . . الحرامي دا قبل يمين و قبل شمال . . و قعد يأشر . . بعد شوية ظهر معاهو رفيقو . . بقوا اتنين . . دهمتين فوق الحيطة . . الدهمة قدر ركيزة الباب . . الفيني كملت طب . . و من الخوفة لامن انزلق مني صوت بي تحت . . و قلت الحرامي البجيب زميلو دا عيلا ناوي علي شر . . محاسن جارتنا . . داك الليلة الحرامية جوها لقوها نايمة . . سمعت الكركبة . . صحت من النوم . . قالتليهم سجمي انتو حرامية ؟؟؟ . . قالوا ليها آآآآآآي . . قالت ليهم زحوا لي كدي خلوني النسرخ . . الساعة الدايرة تسرخ فيها الحراااامي . . الحرامية ديل مسكوها من عراقيب كرعيها . . و اتشلبوها . . و فنننننننن فنوها بي فوق الحيطة. . الليلة الله يكفينا شر الحرامية البجدعوا الناس بي فوق الحيطة . . أنا ضعيفوني . . و ما فيني حيل . . كان جدعوني بي فوق الحيطة عيلا أموت ليهن و أبقى ليهن في رقبتن . . الحويج سيد البقالة الحرامية زمان جو يسرقوا بيتو . . وكت ما لقوا عندو شيء يسرقوهوا . . اتصرفوا بدل يرجعو ايد وراء و ايد قدام . . ملصوا سراويلن و قعدو في الواطة و عملوا ليهو الكاكا في نص أوضتو . . و رجعوا صادين . . شاحدك و ناضرك يا مالك روحي . . الحرامية ديل كان تلبوا الحيطة دي يبقوا زي الحرامية الجو للحويج سيد البقالة . . يدخلوا و يعملوا العملوهو في أوضة الحويج ويرجعوا صادين بي دربهم . . عافي ليهن عفوالله و الرسول . . أحسن من يفنوني بي فوق الحيطة و أموت ليهن في يدهن . . وكت الحرامية ديل أبو يخافوا و أبو يزحوا من الحيطة . . قررت أقوم أنقلب و اتمغى و أعطس و انكرش ليهم مرة تاني . . يمكن المرة الفاتت دي ما شافوني . . لكن وكت اتمغيت وانكرشت و قحقحتا للمرة التانية . . انتو يا الحرامية قوموا و قبلوا يمين و قبلواشمال و أقعدوا أشروا . . جاهم واحد تالت . . بقوا تلاتة . . نعلت اليوم الخالاني أسمع فيهو كلام حبوبتي . . و قلت كان اتمغيت و انكرشت تاني . . الحيطة دي حا تتملي حرامية . . كان من قبيل سرخت الحرااامي كان انحليت . . لكن هسي السرخة كيفن بعد مابقوا تلاتة . . و يمكن يكون في شيء تاني لابد تحت الحيطة . . و حبوبتي الراقدة جمبي دي . . بتضحك علي . . و فضيحتي بتكون بي جلاجل . . في النهاية قررت أن أسرخ و كان حبوبتي قالت لي سرخت لي شنو . . أقول ليها حلمان . . و جاني أب كباس . . لملمت حيلي و قوتي و سرخت بي صوت مقروش . . الحرااااااامي . . حبوبتي صحت من نومها مخلوعة . . مالك يا فيفيد . . قعدت أأشر ليها للحرامية فوق راس الحيطة . . قلت ليها . . الحرامية يا حبوبة . . قالت لي و هي تضحك بي طول حسها . . انت و همان يا فيفيد ؟؟؟ . . ديل جدادات عشة أختي نايمات فوق راس الحيطة.
ود..نقد- مشرف القسم الثقافي
- عدد الرسائل : 3199
الإسم الكامل : وجدي الطيب نقد نقد مصطفى
نقاط : 9971
تاريخ التسجيل : 05/12/2009
مواضيع مماثلة
» احاجي سودانية - ام توب بني
» احاجي سودانية - ام دهيبون!!!
» احاجي سودانية ..فاطمة السمحة!!!
» لوأجبرك حرامي ان تسحب له من ماكينة الصرافة وببطاقتك
» [b]امثال سودانية[/b]
» احاجي سودانية - ام دهيبون!!!
» احاجي سودانية ..فاطمة السمحة!!!
» لوأجبرك حرامي ان تسحب له من ماكينة الصرافة وببطاقتك
» [b]امثال سودانية[/b]
صفحة 1 من اصل 1
صلاحيات هذا المنتدى:
لاتستطيع الرد على المواضيع في هذا المنتدى