الذكرى (14) لرحيل المبدع مصطفى سيد احمد

من طرف ود..نقد السبت يناير 16, 2010 10:55 pm

اناكلي من بعضك
او بعضي من كلك
بدن
ودائر ابقاك واوحد دورة الدم المقسمة بيني بينك والسحن
ابداك من وين .. ابداك مني ولا منك
ابتديك محل ؟ .. محل من ياتو منفذ بدخلك
وكل المنافذ فيك سداها النحل
من ياتو شارع بوصلك
وكل الدروب معطونة لآخر الوحل
بستبيح كل الحواجز وادخلك
من كلامك بدخلك
من بين مسامك بدخل
من أي قاسم مشترك وشبه التشابه بدخلك
ونتلاقى نهرين من تسامي واشتهى
وابداك من حيث انتهت عندك خواتم الانتها
ابداك و اغلى خيام عمري المضى
والقاك مبسوطة اليدين ومفتوحة ابواب الرضا
وابداك من لحظة انستك نار واخذت من قبسك هدى
وانا ضم زاهد من الدروب الما بتجيك ولا بترجع لي من تالاك صدى

من طرف ود..نقد السبت يناير 16, 2010 11:19 pm

يا مشرع الحلم الفسيح
انا بيني وما بينك جزر اترامى والموج اللديح
القدرة والزاد الشحيح كملتو ما كمل الصبر
نتلاقى في الزمن المريح ميعادنا في وش الفجر
يا مشرع الحلم الفسيح
يا مشرع الحلم الفسيح يا بعض مني وبيني ساكن
انا اصلي منك ومشتهيك وبيناتنا ليل الغربة داكن
هبت هبوبك افتح شبابيك المساكن
ووسع دروبك نور مصابيح الاماكن
يا مشرع الحلم الفسيح
يومنا النهب اسلبنا خوفنا
وكبرنا قدرك مرتين
وطول قدر كتفك كتوفنا
يا رهبة الرعد البيسكن بين غناوينا وحروفنا
ضوي الدساكر والضفاف وعبي الحناجر بالهتاف
وسدد مسامات الرعاف ونور مغاراتنا وكهوفنا
يا مشرع الحلم الفسيح
انا وانت والمطر الفسيح
ناخد بعض شكل السما
حدثني دايما كلما تيبس على البر الضفادع
ويهجر الضوء المواضع وتسقط من الكف الاصابع
حدثني دائما كلما تحرد مراسيك السفن
وتسكن مرافيك الزعامات الدمى
حدثني لو تاهت خطانا على الدروب المبهمة
حدثني لو مطرك همى
وعلمنا كلما نبذل على ارضك شهيد يطلع شمس يبهر بأنوارو السما
يا مشرع الحلم الفسيح

من طرف وليد الطيب الأحد يناير 17, 2010 6:55 am

الف رحمة ونور على استاذ الاجيال الراحل المقيم
مصطفى سيد احمد
اكتفى بصوره عن التأبين الاخير بالدوحة فى الليلة التى احياها
الفنان خالد الصحافة
الجميع يقف لحظة صمت حدادا علي روح الراحل المقيم مصطفي سيد احمد
[ندعوك للتسجيل في المنتدى أو التعريف بنفسك لمعاينة هذه الصورة]

من طرف khoaga99 الأحد يناير 17, 2010 8:19 am

ماخليت حاجه عشان نقوله وراك

من طرف khoaga99 الأحد يناير 17, 2010 8:23 am

تسلم كتير
الأخ وجدى ومذيد من الابداعات

من طرف fathi الأحد يناير 17, 2010 10:27 am

ازهري محمد علي في رثاء ود سيد احمد المقبول
عندما يرحل المبدعون يكتب الرائعين عنهم اجمل الكلام .مصطفي سيد احمد فنان لم يتكرر هدهد فينا غناة الطاعم وفات قنعان من خيرا فينا

الشاعر الكبير أزهري محمد علي

سلامات يازول يارائع سلامات
سلامات يا عصارت الخير الفي الناس وترياق الزمن المتعافي
ومحاصر فيك
بسأل عن سكة تتطل منك عن سكة تودي إليك
وزي نهر بينبع منك وما لاقي مصب
بتمدد عشقك من أقصى ضواحي الروح
لي أقصى نواح القلب
بتكثف بي سعة إطلال الرب
ويا بنوت الشارع الطالع قومن كب
قومن للماقصر في غناكن حتمة ولا أتلوم بوراكن تب
ولو تبقى السكة الماشة طشاش ما بتبقى السكة الجاية ضهب
وسلامات يازول يارائع
البارح عصفورتك ركت في البال وطارت وأدت عصفور الريد شبال
وطارت ـ طارت من قولك كر
ما الزول النهر العصفورة بحرض في كلاب الحر
لا بسني وداخل في اللحم الحي
حرش ضلي علي ونتف زغب الخاطرة التخطر على بالي ومنع العصفورة تحوم
استجوب كل الناس البيجو في النوم
متقوم يازول يارائع مهموم
يا مضيع ضيعين وراك واقف حاحاي للنوم
يا مستف رئة الدنيا شهيق ويا مشحتف روح الخرطوم
من ضلاماتك تعال
من حافة البرزخ تعال
من شرفت الملكوت تعال
تعال أدينا هينين من صبر
دي السكة أطول من مشيك
والجرح أعمق من حدود الإحتمال
السابنا والأطفال هناك
قدامك المشوار طويل والريح وراك
كل البيوت أتشرفت بي طلعتك والونسة ما كملت معاك
القرقراب والقهقة
مين سمى ترحالك غياب
الغيبة بتزيدك بها
لودرت بالحزن المصاب ـ كان بعدك الموت أنتهى
يا أحلى حالات الحضور المشتهى ويا منتهى
قوم فرحنا بي دهشت غناك الحي
وحي من جرحك الدامي وفتر حيلك
وحي من ضلك الرامي وحمل شيلك
تموت متل الشدر واقف
تموت واقف علي حيلك
يا حليلك شفتك من وجع طالع وأنت هناك وحيدك
وكل الناس أتنين أتنين
براك واقف في حد السيف
براك يا الماوقف بين بين
تغازل حلمك الفارع فتح بابين على الملكوت
تسلم خواتم عمرك اليانعة
تسلم على حضرت جلال الموت
وتفتح في الأرض نفاج
إذا أمتلاء الفراغ بالصوت
فيا باطن الأديم أفتح
براحات الحنين مشرع
وأنده لي مدن شاخت
أنده لأطلال الغنى الراحت
بيوت في بيوت
وتمرق من شبر مسرح
مدن فاضلة وعالم بتساع الحلم
بقامتك يشتهي التابوت
فما لفظ البحر يونس وما أنسدت شهية الحوت
ويا زول يارائع تمشي بالحسرة وتموت
وسلامات يازول يارائع
وسلامات عوافي

من طرف ود..نقد الأحد يناير 17, 2010 1:55 pm

اشكرك اخي وليد الطيب على هذه الصورة الرائعة التي هي ادق تعبير لهذا الفقد الجلل
اشكرك اخي طلال وانت تملأ جنبات هذا المنتدى بهذه الروائع وبهذه السيرة العطرة للانسان الفنان فلتة الزمان مصطفى سيد احمد رحمه الله وتغمده بواسع رحمته
واشكرك اخي ود الحسن وانت دائما تضيف النكهة لموضوعاتي وسعدت كثيرا بحصولي على هذه المرثية لك الشكر يا شامل
[ندعوك للتسجيل في المنتدى أو التعريف بنفسك لمعاينة هذه الصورة]

من طرف ود..نقد الأحد يناير 17, 2010 2:21 pm

حدثني دائما كلما تحرد مراسيك السفن
وتسكن مرافيك الزعامات الدمى
بالله عليكم الله ركزوا على البيتين ديل كويس وبالذات البيت الثاني وشوفوا المعارضة الليلة بتعمل في شنو؟ والناس في شنو والحسانية في شنو

[ندعوك للتسجيل في المنتدى أو التعريف بنفسك لمعاينة هذا الرابط]

من طرف fathi الأحد يناير 17, 2010 4:02 pm

المشاء الأعظم بروح أيوبية
أسامة الخواض

هكذا كان " مصطفى سيدأحمد" المشـّاء الأعظم .. مشى بين الناس بالغناء فى الأندية والمعاهد والجامعات ودور التحالف ... ومشى وسط حقول الكلام يلتقط فى فرح ما طاب من بنفسجها وسوسنها وفلها .

ومشى فى قلب هموم الناس العاديين يلتقط بؤسها وأشواقها للحرية وللعشق .. وكان فى المشائين من فئة المتفائلين ..... يبشر " بالبنت الحديقة " والإنسجام وأن نكون " أهل البلد بالجد " ... كان أمة وحده وسط فوضى الواقع المهترىء .

وحين أصبح الوطن طارداً لمصطفى العذب ، حمل صوته وأمراضه وحقيبة معاناته ، وهرول فى إتجــاه صوت الوطن العمودى .

ما مر بأرض إلاّ وبكت شوقاً لصوته الممزوج بنكهة الألم والعذوبة ..." كانــت طرابلس والقاهــرة والدوحــة " تهتف فى جلال : " مصطفى سيدأحمد مرّ من هنا " .

كان يكتم عذابات مرضه العضال ، ويصر على الغناء .. كان حين ينهــض مــن غيبوبة غسيـل الكلى الممض ــ كمـا يروى مــلازموه ــ يحتضــن عوده ويغنى مسابقاً الموت ... كان يتشح دائماً وفى أقصى حالات الوجع .. بروح أيوب .

وفى موته كان ــ أيضاً ــ مشاءً عظيماً ... إستقل صندوقه المعقم ، ومشى وحوله المشــاؤون العـظام إلى بيـتـه الأثير لديه " معهد الموسيقى والمسرح " ...

وحتى حين سكن جسده " ود سلفاب " مسقط رأسه ، لم يركن إلى الراحة الأبدية ، ولكنه بدأ مشيه الحثيث الطويل فى مسارب الخلود والأسطورة كأعظم المشائين فى ذاكرة الشعب السودانى .
__________________
السفر الأبيد
صلاح حاج سعيد

ماكنت قايل نفسى يوم
أرثيك يا أصدق خليل
أنا كنت بتخيّل أكون قبلك
أسافر غنوة فى الوتر الجميل
زى ما عبرت معاك
صروف زمن المسافة
وجينا للحزن النبيل
أنا كنت داير الدنيا تمهلنا
ونغنى الفرحة لى
الزمن الخرافى المستحيل

ورحلت ما كان ده الأوان
رحت وحرقت حشا الغنا
خليتنا لى الزمن الهوان
والإرتهان لى خيول
زمان الشنشنة

كل المطارات والموانى
وشفع البلد الفتارى
لسة بارين القطارى
يسألوا الناس
عن خبر زولاً
مسطّر إسمو
فى قلوب العذارى
وفى عيون كل
المساكين الحيارى
زول بيطلع من نفس
طورية ضامة الطين
تكابد طول نهارا
زول بيسكن
فى عيون أطفال
تأمّل ديمة يديها البشارة
ياخى والله الفرقة حارة
وفقدك أكبر
من محيط الدنيا
وأكوانها .ومدارا

طليتنا زى حلماً جميل
فجأة فى غفلة أنسرق
أسطورة تحكى
أمانى جيل
فى حب غناك
كان ليهو حق
أديتو فى الدنيا الأمل
وريتو كيف فى الحق يقيف
من غير وجل أو إنبهار
علمتو بى حس النغم إنو الكلام
لازم يكون واضح
كما شمس النهار
صدقك ملاهو حماس يقين
بالخير وبالحق
والنضار والإفتخار
إنو الحبيبة هى الأرض
والتضحيات عشان
عيونا هو الفرض
والدنيا ورّاثا الصغار

وعرفنا يازول قسوة
الضنا والتعب
والإرتحال فى
غفلة الزمن الصعب
وقولة الوداع بالضبط
والسفر الأبيد من غير رجوع
أو غير متاع
وبكت عليك
كل الشوارع فى المدينة
ناحت عليك كل الفواصل
فى الغنيوات الرصينة
وإنكتم نبض الغنا
جلل سواد حزنك سنا
وإتوشح المنا بالضياع
وكان بدرى يازول الوداع
لا سكة لى درب الرجوع
بعدك أغانيك إلتياع
مسكونة بالأسى والخشوع
لكن بريقك ما خبا
أبداً بريقك ماهو ضاع
ساطع كما نور الشعاع

منو قال هو فات
زولاً وهب كل
الحياة للأغنيات
منو قال هو فات
ما أظنو زيّك يقولوا فات
يامن وهب
كل الحياة للأغنيات
يا من ترك فى
قلوبنا أنبل ذكريات
يا من ترك أحلامو
فى كل الجهات
وخلّد معانى الروعة
بى كل الصفات
ما أظنو زيّك يقولوا فات
يامن وهب كل
الحياة للأغنيات

ورحلت ما كان الأوان
رحت وحرقت حشا الغنا
خليتنا لى زمن الهوان
والإرتهان لى خيول
حروف الشنشنة
__________________

من طرف ود..نقد الأحد يناير 17, 2010 10:01 pm

زدني عشقا و ابداعا زدني ياود الحسن يارائع
[ندعوك للتسجيل في المنتدى أو التعريف بنفسك لمعاينة هذه الصورة]

من طرف khoaga99 الثلاثاء يناير 19, 2010 8:40 am

كل ماتباعد بينا عوارض

كل ماهواك ياطيبه مكنى
قمه الأبداع يافتحى
ومذيد من الجمال يازول يانادر

من طرف ود..نقد الأربعاء يناير 20, 2010 10:26 pm

هاكم دي يا فتحي وطلال من الشاعر المبدع ازهري محمد علي

الخروج من بيت النمل
***********
تمى غناك الخمجان
وزودى إيقاع الرقص
ومحل ما تمدى إيدك
أنزلى أمطار
وريحى أعصاب الطقس
مدستر فيك الزول الجواى
ومنك أول زول
نازل دستوروا معاى
أول زول صالحته لوجه الأرض
كان منك
آخر زول ناهر خوفى
وعارف معنى الرفض
كان منك
يا متوهطة حلم الكل
ومعلنة إنك ضد البعض
أنا راغب أستخلص عذبك
من بحر الشك المالح
أسقيك حليب الروح
أكسيك من عُري الزمن الفاضح
يا وحم العشق المحموم
ومخاض الجرح الفادح
أنا ليه قدامك .. دون
وعدتك نمشى نخصب حلم المويه
بوعد الرمل
رجعنا نكلم حلم المويه
برفض الرمل
وقعدنا بنقطع فى المويه وفى الرمل
سرقوك منى ودسوك
فى بيت النمل
طراك الصهيل حس الصرير فى بابى
أنا عازمك مقيل ومخصمك ما تابى
خليهو العويل كان يسترك جلبابى
يا جدية العُزاز ما بلحقك نشابى
فى الوادى الفسيح مرقت براها كلابى
فزت فى القنيص صدّن بلاها كلابى
أدتنى السلام سلمتها السبابى
حنت للرحيل رحلت مع الجلابى
وحّيدا الكتيل كتل المنخلع للدابى
ويا خيه .. كل البراحات وسوسه
الهاويه خلفك والبحر
وقدمك طنين الهلوسه
محمدك ساساق دروب الهم
محمدك .. طول المدى الشاسع
بين الإيدين والفم
ويا إنتى العشم مزبوح
أدسك فى خلايا الدم
تمرقى بى خراج الروح
حمل كاذب رعد أبكم
حبل متروك على القارب
واشوفك فى الحصار باهته
نتف غضب العُصار ريشك
حتل فيك الكلام الرخو
نقز فى دمى درويشك
واظنك إنتى
غشاك الشعور بالزهو
سقط سهواً غناك الكان
بكلب جلدة الغفوة
وينفذ من مسام الصحو
لكنك بتطلعى من حوافر الخوف
تطلعى من حلم مهووس
ومن فجة سفر طول
يسربك الحنين فينى
تعلنى عن زمن آتى
تعلنى عن وطن أجمل
ولكنك بتطلعى .

الذكرى (14) لرحيل المبدع مصطفى سيد احمد

الذكرى (14) لرحيل المبدع مصطفى سيد احمد

رد: الذكرى (14) لرحيل المبدع مصطفى سيد احمد

رد: الذكرى (14) لرحيل المبدع مصطفى سيد احمد

رد: الذكرى (14) لرحيل المبدع مصطفى سيد احمد

رد: الذكرى (14) لرحيل المبدع مصطفى سيد احمد

رد: الذكرى (14) لرحيل المبدع مصطفى سيد احمد

رد: الذكرى (14) لرحيل المبدع مصطفى سيد احمد

رد: الذكرى (14) لرحيل المبدع مصطفى سيد احمد

رد: الذكرى (14) لرحيل المبدع مصطفى سيد احمد

رد: الذكرى (14) لرحيل المبدع مصطفى سيد احمد

رد: الذكرى (14) لرحيل المبدع مصطفى سيد احمد

رد: الذكرى (14) لرحيل المبدع مصطفى سيد احمد