هدا السودان

بتسال جد عن السودان
امامك خضرة منشرة
ومولع بي رسم برة
برج ايفل فرد مرة
وين الساقية والواسوق
وين روعة جبال مرة
هدا السودان مليون ميل
مناظر روعة يامسكين
كفانا النيل
وضفة خضارا مد العين
كفانا نخيل
ونخلة براها ركن فوقا قمريتين
كفانا تبلدي شال الشيل عشم
داخرنو عطشانين
كفانا البان بيتني
يحاكي امونة في الرقصة
ويشيل شبال من الموية
وتطير في التنية عصفورتين
اكان رسام كدي ارسم لوحة
كان فنان كدي ارسم زول نبيل وعفيف
قصب يتني بي العيش ريف
كدي ارسم ريف واحلي خريف
وناس لماها اوضة طين
كدي ارسم شعبة شايلة مرق
سنين وسنين
لافتر الضراع فيها وجبينا عرق
عشان يسقي التراب بي الدم مهر
مارقنو للسمحين
كدي ارسم حوش كبير جالوص
وفيو حاجتين
فيو راكوبة فيو نيمة وضل ماهل
عليو حاجتين
عتود راقد وزير بارد
ومربوط في الفرع كوزين
اكان رسام كدي ارسم
شيخ كبير السن ولابس توب وجلابية
جاري عليو طفل يافع
يناديو يابا جيب مية
ابوه يقلو بس من وين
كدي ارسم شافعة في التسريح
يدقوها تتبكي يدقوها وتزيد صييح
كدي افتح قوس وارسم عازة لابسة التوب
ومريم والسعن والروب
كدي ارسم شيخ يداعب سبحة اللالوب
وخيط الفجر بان يادوب
ختم جزئين ووشو سراج
وعادل راسو احلي مزاج
وليدا تاج يصبح يمة كيف الحال
وكيف ياحاج
وامو هناك مع الواقود ملانا عجاج
كدي ارسم صاج وباب نفاج
قصادن قلة فوق الايد
كدي ارسم كسرة ماانعاست او انعاست
مخير انت بين امرين
كدي ارسم قربة
مليانة وتنقط باردة وابريقين
اكان رسام كدي ارسم زول نحيل وضيف
وعند الحارة سيفو سنين
يسوقبو الليل مع الرحل
يهزبو جوة في الدارة ورابط في الضراع سكين
وقت ما الضيف يدق الباب
يجابدو يجابدو لي الديوان
يتلب في الزريبة سريع مع الخرفان يحد اتنين
ويبدا ينادي يانسوان
فطورنا متين وضيفنا جيعان
وطبعو خزين
اكان رسام كدي ارسم
عادة من عاداتنا في السيرة
وجرتك سار عديلة وزين
وزغروتا تشق الحي
وكل الراجي يوم فرحو يقول امين
كدي ارسم قرمصيص والميس عروس وعريس
وناس جاين يهنوا يغنوا يتمنوا
مال وعيال ويرجعوا ياخدو كم شبال
كدي ارسم خال وبهجة فال
تلف القعدة لفة شال حريم ورجال
تطرز فرحة القاعدين
اكان رسام
كدي ارسم شلة من لمة صغارا فرحو بي الجية
واصلا كانو فرحانين
كدي ارسم شفع الحلة وكت يبنوه بيت الطين
كدي ارسم بس بيوت الطين
ولون الطين وطعم الطين وريحة الطين
ويانا الطين ومقتنعين قناعات فينا من قمنا
هدا السودان وشفت جمالو في اللوحات
دا حالتو الراسمن انسان
فمابالك اذا السودان بي ريشة المولي
وجه افريقيا في الخرطة
كمان المولي هو السواهو قلب افريقيا
خط نقطة
وخليني اللعنون معرض اللوحات
بلد لقطة بلد جنة
هدا الكوثر وديل العين
بلد واطاطا مصلاية وسماها الدين
بلد في كل باب سبحة
بلد لالوبة ياهو الدين
بلد تحتاج مداد الكون عمر نوحين
عشان تكتب عن الفيها وماظنيت توفيها
ويفضل دين
هدا السودان فرد واحد
ومافي الدنيا منو اتنين