روائع هاشم صديق

من طرف وليد علي الجمعة مايو 16, 2008 4:00 pm

الأستاذ/ هاشم صديق من رواد الشعر السوداني ومن رواد المدرسة الشعرية الحرة
أتحفنا برواع في شتى المجالات وإني إذ أورد بعضا من روائعه إنما لإعجابي الشديد بنظمه السهل والممتع
تغنى بقصائده العظام من المطربين على سبيل المثال لا الحصر الأستاذ محمد الأمين
وله الملحمة (قصة ثورة) في ذكري ثورة 24 أكتوبر

هاشم صديق شاعر سودانى وكاتب مسرحى واذاعى تلفزيونى مميز
نال جائزة الدولة عن النص المسرحى لموسمين متتالين
كما انه حائز على دبلوم معهد الموسيقى والمسرح بتقدير الدرجة
الأولى فى النقد العربى
استاذ ومحاضر بمعهد الموسيقى والمسرح بأمدمان
وله ديوان شعر بعنوان كلام للحلوة اصدره عام 1975

همس الشوق

يا ريتنى لو أقدر أقول

فيكِ الكلام الما انْكتب

واجلى المقاطع بالدهب

وافرد صباح حُسنِك وشاح

يمسح عذاب عمرى المسطرّ باللهب

بريدك...

كلمه كان رفّت

يِهش ثغر النجوم ويسطعَ

ولما ينادى همس الشوق

يقيف كل الزمن ويسمع

عيونك ديل عيون أهلى

حُنان زى نغمة فى مقطع

وطُهرِك تاج جواهرهُ العزه

وانتى العزه ليك تركع

بحبِك يا صباح العيد

ويا فَرَح العريس السار

واحِسّك فى سما الأزمان

شمس بِتضَوى للمشوار

زمان يا حلوه ساقنى الليل

وغِبْتَ وضعتَ فى الأسفار

ولّما لقيت عيونك ديل

بديت اعشق عيون الدار

وَحَاة ريدى اللى شاف طيفِك

كتير قُباّل يلاقى ويشوف

جراح الماضى بيك نامت

وغابت كلُ رعشة خوف

بحبك ومافى غيرك نور

يهِل ويغمرُ طريق الشوف

وما فى بَلَاك نور بِسْطَع

ولا فرحاً يسوقنى يطوف

1971

ونواصل ،،،

من طرف وليد علي السبت مايو 17, 2008 11:13 am

كلام للحلوة

لما شُفتِك

ليلِى ضَّو وبَقَّ نور

ونرجس الجنه المفرهد

رفّ بى جِنحَات عطور

وغنَّى فارسِك

خَتَّ صورتِك فى الإطار

فى الليالى نَجِم يِلالى

ونسمه فى وهج النهار

وقال فى وَصفِك لما بنتى

أحلى مِنِّك . برضُه إنتِى

وما فى غيرِك زول معانا

حتى كان يا سمحه غِبتى

ومَرّه جَالَن الف خَاطِر

بى عيون عقلى المسَاهر

فجأه عينيكِ الحبيبه

!قالو سارح وين مِسَافِر؟

عِشتَ قولِن شيل وصَفقَه

وقُلت بس يا ريتنى القى

همسه فى حُلم الأميره

أو سَبَايب فى الضفيرة

أو عِقيد فى تِبرِ جيدها

أو قليب فى راحة ايدها

يا زمان أسمعنى واكتب:

البَرِيدها وريدها سِيدى

وريدِى سِيدَها

الزمان لوحتى بالغ

ما أظِن فى زول يعيدها.

يا حَلاتِك

مره همسه .. ومره نَسمَهومره هَلّت نَجْمه غابت

ومره صَحْوَة غمزه نامت

ومره ضحكه تَرَضِّى شوقنا

ومره كلمه تضِّوى فوقنا

ولمّا نسرح فيكِ قَادلَه

زى ملايكه علينا نازله

بَس نغنى:

يا حلاتكُم يا أهَلنَا

يا مصابيحنا ونجومنا

الضّاويَه فى واحات زَمَنَّا

1971

ونواصل ،،،

من طرف وليد علي الأحد مايو 18, 2008 1:17 pm

زول بحبك

زول بحبك

وماكا خابرو.

ياما لاقيتو وبسالمك

وداسِّي منك

حال دواخلو.

جُوّه فيها

الموج يدافر

وانت يا محبوبو

فاكر

انو رايق

وقلبو شاغر.

أصلو زول

بِتْدَّس ملامحو.

يَا ما لاقيتو

وبصافحك

موت بجيك

وما كا عارفو.

زول بحبك

وما كا شايف

يا ما سالَم

وصوتو غالَب

رجفه

فس همس الشفايف.

مره شَدّ

على ايديكا

وقلبو جنّح

ورقّ ليكا

ركّ

في شُفة عينيكا

وقرّب يشرح

جنو بيكا.

إلا حلّق

في المخاوف

أصلو جرّب

وحلمو نازف

موت بريدك

وما كا عارف.

زول بحبك

وفيهو ساكن

يا ما دسّاكْ

في ملامحو

وفيها ليكْ

سوَّر مساكن.

كم لقاك

حياك وصبَّح.

وفي ابتسامتك

قرَّب يسرح

كان مناهو

يقيف ويشْرح

إلا خاف

من "بس" و"لكن"

وينكسر خاتر

مشاعرو

ويبقى صبح الدنيا

داكن.

أصلو زول

ممكون وصابر

جوه فيهو

الموج يدافر

وبره

في قسمات وجيهو

تلقى

موج البحرِ ساكن.

زول بحبك

وما كا خابرو.

يا ما لا قاكا

وبسالمك

وداسِّي منك

حال دواخلو.

30/9/1990م

ونواصل ،،،

من طرف ابو الزعيم الأحد مايو 18, 2008 9:11 pm

الرائع ولـــــــــــــــــــــــــــــــــــــــــــــــــــــــــــي

لك التحية
وانت تكتب عن شاعر بقامة هاشم صديق صاحب الروائع

زول بحبك

وما كا خابرو.

يا ما لا قاكا

وبسالمك

وداسِّي منك

حال دواخلو

................
صحب المفرده المدهشه ... والسهل الممتنع

زدنا من فيضه ولا اظننا نرتوي

لك وله مليون سلام

من طرف وليد علي الإثنين مايو 19, 2008 4:39 pm

بل لك أنت مليون سلام يا رائع

حروف إسمك

حروف اسمِك

جمال الفال

وراحة البال

وهجعة زول بعد ترحال

وتنّية حلوة للشبال

ودنيتنا ومشاويرنا

وغنواتنا الى ما بتِنقال

حروف اسمِك

نجوم ركّت على الياسمين

فرح فى عين جمالها حزين

أساور فى إيدين طفلة

بتحفظ فى كتاب الدين

زَفَافَ عاشقين بعد فرقه

وسط باقات دُعَا الطيبين

حروف إسمِك

عقد منضوم بخيط النور

وطلة وردة من السور

ونغمة تنادى من طمبور

وشُعلة فرحة فى الوادى

تَشِع جَذلانه ليها شهور

حروف إسمِك

وَكِت أشتاق وأرحل ليك

وأسرح فى عسل عينيك

بِتَحضِنّىِ......

قَبُل ألمسَ حرير إيديك

تأرجِحنى..وتَفَرحنى..وتخلينى

أدُق سدرى

وأقيف وسط البلد واهتف

بريدك يا صَباح عمرى

ونواصل ،،،

من طرف سوباوي الثلاثاء مايو 20, 2008 11:56 am

أزيك يا وليد وكيف حالك ..

مرحق التحيات لك وأنت تدخلنا في عوالم هذا الفنان الجميل

هاشم صديق .. حقاً هو صاحب مدرسة متفردة .. بمفردة

السهلة ا لممتنعة والممتعة في ذات الوقت .. يحمل معانيها

بالكثير من القضايا البتهبش في العصب ..

له ولك كل ما تشتهون من أمنيات ،،

من طرف وليد علي الثلاثاء مايو 27, 2008 3:20 pm

أحييك سوباوي ولك كل الود

بريق الماس

عيونك...

سمرة العَسَل الموشَّح

بى بريق الماس.

ولما رموشك الحلوين

يَرُشَّن فوق تعبنا نِعاس

يِرِف همس الحلم فى الروح

بِجِنحين من صدى الاجراس.

ويسيل صوتِك

ترانيل زفّة للجنه

وكلام ولهان كِتِل جَنَّ

واقيف حيران أنادى الطيف

واخاف أسرح..أقوِم كيف

وانا المشدوه مع العَسَل

الموشَّح بى بريق الماس

منو البِقْدَر يشوف عينيك

ويفيق ويِرْجَع يحس بالناس

ولما عينيكى يا حلوتنا

تتِشَاقا

وتقول باكِر وفى الأحلام

حَنِتلاَقى

أنوم واصحا

وانوم تانى

عشان القاكِ يا سمحة

ويُمر الليل . وليل بكره

وما القاكْ

ويصير وعد العيون ذكرى.

واقابلِك فى الحقيقه قريب

واعاتبِك حول

وتتشاقى وتقولى نسيت

واعاين فيكِ زول مذهول

بَرِق شَعَّ وسَمَار مغزول

واقول يا ناس أنا المكتول

ولما أتوه مع السرحان

أقوّل..ياربى يا فنان

عيونها عُزاز...

طَرَب حَزنان فِرِح مره

حروف آيتين

تَسَبِّح بى قُدُرْةَ الله

يقين إنسان لِقَى التوبه.

نَقرة طار فى إيد مدَّاح

ونَشوَة غابِّى فى النوبه.

يا ريت فى عيونها إتحَكّر

أكان ترضى

أنوم واحلم مع المنظر.

أعيش راهب على المحراب

وأطل واضْفُر رموشه حجاب

عَشان أحميها من الناس

واعود تانى

أغازل سُمره العَسَل

الموشّح بى بريق الماس

ونواصل ،،،

من طرف وليد علي الأربعاء مايو 28, 2008 3:00 pm

وجود

لا محتاج

عشان المس

وهَج روحِك

أمد ايدَي.

لا محتاج

عشان شوفتِك

تشوف عيني.

ملامحك حاضره

!وين بتروح؟

ووهجك فيني

ساكْن الروح

24/7/1991م

من طرف وليد علي الخميس مايو 29, 2008 5:39 pm

سحر الهوى

أيا نفس الهوى

الممدود.

ويا طل السَحرَ

نقّط

على فرع الاسى

المشدود

ويا باب المنى

الفتَّح

على درب الهوى

المسدود.

نَقَعِ صوتِك

سَكن بيهو السلام

في الروح.

ليك بدّع

وتر قلبي

اتترنم نبض زمني.

وبيك قِدْرَت

جروحي تروح.

عليك تاوق

عليك تاوق

دَغَش موعود

وانعتق الفرح

رفرف

واتْهَدَّت سدود

وسدود

أيا حُضن الهوى

الأرْحب.

خليتي الشَمسِ

أقرَب.

كللتي الجُزُر بالغار

وعمَّدتي الحنين

بالنارِ.

ورَصّتي النجوم

أسرار

وجَّملتي البلد

أعذب.

ومديتي الأمل

والايد

سويتي العجب

أعجب.

وقع سور الأسى

الممدود

وانفتحت

حدود في حدود.

أيا نَفَس الفضا

الممدوِد.

ويا طَل السَحَر

نقَّط

على فرع الاسى

المشدود.

رجَّعتي الوجود

موجود

رجَّعتي الوجود

موجود.

10/12/1991م

ونواصل ،،،

من طرف وليد علي الجمعة مايو 30, 2008 12:36 pm

ميلاد

طالعه

من خاطْر البَحَر.

مغسوله

زي قمر السَهَر.

مرسومه

بي شَفق الزَهَر

طالعه

من زَبد البَحَر.

الموج على شَعْرِك

عَزَف.

الموج على نهديكْ

هَتَف.

الموج على ساقيكْ

وقَف.

طالعه

من قَلْب البَحَر

مكتوبه

بي قَدَر الصُدَف.

عينيكْ بَرَق

شوقِن لَصَف

رقص المُحار

ضحك الصَدَف.

طالعه

من حلم البَحَر

ايديكْ

محنَّنه بالشَفَق

ضحك مِشَعْشِع

بالألق.

تاجِك

مرصََّع بالصَفَق.

طالعه

من فَجْر البحر.

حُضنك

هَمَسْ شعْر الصباح.

خَتَّ النُقط

فوق الصَرَاح

ضوَّع عبير

ورد الجِراح.

أشَّر

على الزمن الشَرَق.

قابض

على جمر الورق.

خايض

على لهب الشَفقَ.

طالعه

من عُمق البَحَر

الموت يبوس

خدك يطول

يغمُر يباس

قفر الأفول.

قَصّر حضور

زمن الذهول

رجَّع نَفَس

نبض الفصول.

طالعه

من خَاطْر البَحَر

مغسوله

زي قمر السَهَر.

مرسومه

بي شَفق الزَّهَر.

21/5/1992م

ونواصل ،،،

من طرف crash السبت مايو 31, 2008 7:12 am

شكراً أخ وليد على هذه القصائد التي هي بالفعل روائع

من طرف وليد علي السبت مايو 31, 2008 4:37 pm

لك التحية كراش فقد قال صفي الدين الحلي
خلى الأصمعي جوب الفيافي *** في نشاف تخف فيه الرؤوس
انـــما هـــــذي النفوس حديد *** ولذيذ الألفاظ مغناطيـــــــــس

الملحمة

لما الليل الظالم طوّل

وفجر النور من عينّا اتحول

قلنا نعيد الماضى الأول

ماضى جدودنا الهَزَمُوا الباغى

وهدّوا قلاع الظلم الطاغى.

وف ليله وكنا حُشود بِتصارع

عهد الظلم الشبَّ حواجز

شبَّ موانع

جانا هتاف من عِند الشارع

قسماً...قسماً

لن ننهار

طريق الثورة

هُدى الاحرار.

وغضب الامه اتمدد نار

والكل يا وطنى حشود ثوار

وهزمنا الليل

هزمنا الليل.

والنور فى الآخر طل الدار

والعزة اتهادت للأحرار.

وطنى أنحا سيوف امجادك

ونحنا مواكب تفدى تُرابك

ولِسّه الشارع بِشهَد لينا

فى يوم الغضبه حصاد ماضينا

مشينا نَعَطّر حقل الثوره

بِدَم نَفْدِيبُو بلادنا الحره

وكان اكتوبر فجر الغضبه

كسرنا قيود الماضى الصَعَبه

لما مشينا مواكب صَامده

تهدر- وتغلى ... وتهتف راعده:

الرصاص لن يفنينا.

وسال الدم فى أرض الوادى

فَدينا النور بالروح يا بلادى

وكانت صفحة حكاها العالم

وفجر اكتوبر طَلّ وسَالَم

كان فى الجامعه موكب هادر

صمَّم يجلى الليل السّادر

وكان الليل السادر غادر

فجّر غدرو سموم دخان

ورُصاص من صوته صِحَا السودان

والشعب الثائر

صمّم هادر

يصرع ليلنا الداجى الطَّوَّل

وكان القرشى شهيدنا الاول

وما اتراجَعنا

حلفنا نقاوم ليلنا وسِرنَا

نذرنا الروح ومَسَكْنَا دَرِبنَا

للشمس النايرة قطعنا بحور

حلفنا نموت أو نلقى النور

وكان فى الخطوه بنلقى شهيد

بى دمه بِيِرسُم فجر العيد.

يا اكتوبر

أنِحْنا العِشنا ليالى زمان

فى قيود ومظالم وويل وهوان

كان فى صدورنا غضب بركان

وكنا بنقسم بالاوطان

نَسَطَّر اسمك يا سودان

بدمانا السّالت راويه الساحه.

وحلفنا نسير ما نْضوق الراحه

شهرنا سيوف عِصيانّا المدنى

إيد فى ايد حلفنا نقاوم

ما بنِترْراَجع وما بِنءسَاوم

بينّا وبينك تار يا ظالم

خُطانا تسير فى درب النصر

هتافنا يدَوّى يهز القصر

كسرنا حواجز ..أزِلنا موانع

صفنا واحد

عامل.وطالب..زارع وصانع

وهزمنا الليل

هزمنا الليل

والنور فى الآخر طل الدار

والعِّزه اتهادت للأحرار

يا ساحة القصر..يا حقل

ويا واحهَ بتَحَضِن روح(نَصّار)

روينا ورودك دم ثوار

وشتَلنا فضاك هتاف أحرار

خَطّينا ترابك احرف نايره

بتحكى سطور ايامنا الثايره.

وشلنا الشهدا مشينا ونهتف

وجرح النار فى قلوبنا بينزف

سَجّينا الشُهدا وجينا نقاوم

ما بنِتراجع وما بِنساوم

وفجأه ونحنا صفوف بتصمم

زغرد فجر الثوره الحالم

والنور فى الآخر طل الدار

والعزه اتهادت للأحرار

قسماً..قسماً يا اكتوبر

نحمى شعارك

ونجنى ثمارك

ونرفع راية الثوره الغاليه

عاليه ترفرف فوق الساريه

عليها شعار الثوره الأكبر

رسُمه النادر زاهى واخضر

ولِسّه بنقسم يا اكتوبر

لما يطل فى فجرنا ظالم

نحمى شعار الثوره نقاوم

نبقى صفوف تمتدّ وتهتف

لما يعود الفجر الحالم

1968

ونواصل ،،،

من طرف وليد علي الأحد يونيو 01, 2008 7:10 pm

عناق

سوفَ تهبطينَ

ليلة

ودونما عناءَ

فوقَ جسرِ ساعدىَّ

تنشرين ذلك العبيرَ

فوق غابةِ المسامْ.

تلمسينَ ذروةَ الحنينِ

فى ارتعاشةٍ تجيشُ

من أصابعِ الكلامْ.

ترقصينَ مثلَ نجمةٍ

تطيرُ بالنبيذِ

فوق شُرفةِ الظلامْ.

امدرمان- يوليو 1994م

ونواصل ،،،

من طرف crash الأحد يونيو 01, 2008 8:05 pm

وما زلنا وسنظل دائماً في انتظار المزيد من الروائع..

من طرف وليد علي الإثنين يونيو 02, 2008 6:54 pm

لك التحية كراش وأنت تتابعين الروائع

هذا المساء

هذا المساءُ

هل يعود البرقُ

رخواً

ام يخط البرقُ

!!"لا"؟

هذا المساءُ

هل يظل الليلُ

طفلاً

ام يئن الليلُ

!من صفعِ الغناءْ؟

استعينوا بالصلاةِ

على الوباءْ.

ثم أمشوا

فوق أطرافِ الأصابعِ

نحو"توشكى"

ة"كربلاءْ".

لا بأس من وترٍ

ينوحُ

ويستحيلُ إلى بُكاءْ.

لا بأسَ من سيفٍ

على رِجْلينِ

عُقدا القرفصاءْ.

لا بأس من سفرٍ

ومن مطرٍ

ومن سرجٍ

على متنِ الهواءْ.

هذا الشتاءُ

هل يصير الماءُ

ثلجاً

!ماءْ؟

دثرينى

بالتحذلقِ عن زمانٍ

سوفَ يغتالُ

"الصفوفْ"

وعن ثمارِ الصبرِ

تحتضنُ "الرُّفوفْ"

وعن غروب ِ الفقرِ

وعن فتاوى القولِ

فى حكمِ الغناءْ

وعن التبرجِ

والتبهرجِ

وانحلالِ الخنفساءْ

لا بأسَ

!من دفءِ الهُراء

لا تقولى:

نحن بالاحلامِ حَلّضقنا

على قوسِ قُزَحْ.

بل ردّدِى

فى الحلمِ جهراَ

أنَّهُ صارتْ لدينا

هذه السيارةُ الهيفاء

أسموها"الشبحْ"

هل يجوزُ الحلمُ

شرعاً

!أننصير الأغنياءْ

..............

هل يجوزُ الحلمُ

!فى هذا المساءْ؟

امدرمان 5/9/1994م

ونواصل ،،،

من طرف وليد علي الثلاثاء يونيو 03, 2008 4:35 pm

الإختيار

حاول افهم يا حبيبنا

واصْحَا من خَدَر العَشَم.

انتظرنا ولاّ الصبر جاب الفَرَح

لى عيونَّا..لا الليل انهزم.

اليقين ما الإنتظار

بين دموعنا وفى الندم

اليقين فى الاختيار

إمّا نِتفَهّم وجودنا

وامّا ياخدنا العدم.

حاول افهم يا حبيبنا

مافى غير شوك الطريق.

مافى غير نمشى ونعاند

فى الحواجز والحريق

أشرف الخطوه الشجاعه

واكرَم الصَحْوَ العميق

عزة الزول البموت

فى يوم نضالو

مجدُو فى شتلو وترابو

وبذره فى طين الفريق

ما الجروح مهر الاحبة

والالم نجم الطريق.

واليقين صحو المدينه.

والنهار لهب الحريق.

والبِخُون قش البوادى

يا زمان نَشِّفلُو ريق.

خَلِّى حبك يا حبيبنا وعى أُمه

ودَحرِ غُمه

وريح تَهِز جَبَل السواد.

ما نحنا برضو عيون بلدنا

وساعو لى يوم لى يوم الحصاد.

ولو زمان ضُقْنَا الندم

ولو زمان عشنا العَدم

برضو لِسّع يا حبيب

وهج الجَمُر تحت الرماد.

وما فى معنى لانتظارنا

والف مضمون فى اختيارنا

واليقين عِزَّة أرِضْنَا

ورايةالصَحوه الجهاد.

حاول افهم يا حبيبنا

لاهو صبرَك ولا هو صبرى

فى جحيم الانتظار

أكبر أكتر يا حبيبنا

معنى اسم الإختيار

هو مضمون اليقين

فى النضال والانتصار

للحقيقه ولى وجودنا

ولى قيمنا ولى جذورنا

وللنهار

وحتى لو صعبت طُرُقنا

وعادى صحوتنا الجدار

برضو أشرف يا حبيبنا

إنُّه نتحدى ونموت.

ويبقى معنى الإختيار

فى يقين إسمو الكرامه

وفى هزيمة الإحتقار.

ديسمبر 1968

ونواصل ،،،

من طرف وليد علي الأربعاء يونيو 04, 2008 3:13 pm

وصف السمحة

سواد ليلتين طُوال بالحيل

ضافيرِك ديل

وطرفك لما حام فوقى

غلبنى مع البِغَنّو الشيل.

وأمانه وكِت أشوف رقصِك

واشيل شبال

أبيت فى حال

تقول فارساً رَمَنُّو الخيل

أمِس فى بيتنا دقّ الباب

وزار حُسنِك طِرَى وطلَّ

وكِت سبق السلام خَطْوِك

رجَف قلبى وركع صلى

وبسيمتك لما غَنَّت لَىْ

وطاش صبرى وغِلِب قَلّ.

رفعت أيْدَى لخالقِك فوق

وقُت يا ناس أريد الله

وأحب الله

هى عيون شنو؟

دى المافى زول شافها وسِلِم

حتى الزمان عِشق الوَصِف

فيهن سَرَح غَلَبُو النَّضِم

زى سيف سَنِين عينيكى ديل

البدْنَا وين يرجع يِلِم

لو أقدَرِن يوم بالغُنا

يا دنيا داك يوم المُنَى

وبعد الوصف يحلا ويتم

إن كان أعيش وان كان أموت

يا سمحه أبداً ما بِهِم.

1974

ونواصل ،،،

من طرف وليد علي الخميس يونيو 05, 2008 9:33 pm

أتراح الحول الأول

الى روح والدتي العزيزة آمنه محمد الطاهر
(بت جنه)

من برد الليل

متغطي بتوبك

أتنفس وهَجَك

والقَلُب اتدفِّا.

أتذكَر سفرك

ونَفَس الكون

الجانا مَكفّن

ونام في محفّه.

أتذكَر شهقة

باب البيت

وجناح الصاقعه

الحوّم ورفَّ

أتذكر يُمه

صُراخ الليل

والدَمْع السيل

والبِرِش الفيكْ

ارتاح واتلفِّ

من سفرِك مرّ

الحول الاَول

والزمن الاسود

دوَّر ولفَّ

لا جرحك نام

لا صوتك صام

لا وجعِك خفَّ

يا محفوره

في قلب الخاطر

يامرسومه

في بطن الكفّه.

الزمن اتساقط

ورقو الأخضر

أصبح أصفر

العالم جفَّ.

استنيتك

متل العاشق

موج الشوق

في صدري جدوال

وقلبي تشقشق

فوق اغصانو

طيور الجنه

تومين في الشوق

يايمه انحنا

وبالحول استنا

مما فُتّي

-حفيف اقدامك-

حِلْم الشارع

ووتر الباب

لي نقءرك حنَّ

آه يايَمه

مما فُتي

الزمن اتغّير

الشعر اتحَّير

العالم صنّض.

يا مليانه

بشاشه ولون

يا حنيَّه

بحجم الكون.

يا الأديتي

خُطان عيون.

يا العلمتي القلم

اتحدَّى

يالساندانا

في وكت الشِدَّه.

يا الاحساسك

نوّضر وأدَّى.

يا أنفاس

الزمن العدَّ:

أحبك

موج الشوق

في سدري جدوال

وقلبي تشقشق

فوق أغصانو

طيور الجنه.

أحبك

وما في حبيبه أحنَّ

يا مفقوده

يا موجوده

يا "بت جنه"

من برد الليل

متغطي بتوبك

وحيد زي نَجمه

مدارها غيوم.

جبيني مولع

وعيني تدمِّع

معبور بالحُمى

أناجي النوم

العَبْرَه تخلّي

همومي مساهره

الوَحْدَة تفتّح

عين الذاكره.

أناغمك يُمه

تجيني مسافره

ألقاكِ محلّقه

فوق عيني.

ايديك مفرِوده

ونازله عَلَي.

بشويش كفيك

في جبيني اتْخَتّن.

العرق اتفصّد

الجسم اتعطّن.

فتحت عينَي

في عينيكْ اتملّن.

شابيت بالشوق

لي حُضنك أقوم

حسيت كفيكْ

في سدري تحوم.

تَبْتَبْتِي شقاي

هَدْهَدتي هموم

ومنِ برد الليل

كَرْفَسْتَ أساي

غبيّت في النوم.

من برد الليل

متغطي بت بتوبك

أتتنفس وهَجك

والقَلْب اتحسَّر

أتذَكَّر درسِك

حصص الرحله

فصول الدفتر.

يا مهمومه

بوجع الناسْ

يالاحساسك

واقد وحاسْ

يالرِبيتي

وغرسِك خضَّر.

يا مغبونه

بظُلم العسكر.

أتذكر نضمك

ونسة قلبك

سمحه وصافيه.

أتذكر يُمه

حلاوة اللُقمه

وسَمَر الصُحبه

وضحك العافية.

ياما قَسَمْنَا

غبينة الحُرقه.

يا ما عَبرنَا

مصايب الغُربه

يا ما صرخنا

في وش "المافيا"

يا ما عشقنا

الناس البُسطا

يا ما شَهَرنا

سيوف القافيه.

من بير الليل

صوتك رنَّ

والزمن ارتجَّ.

من توب الليل

نجمك حنَّ

تاوق وفجَّ.

في قلب ِ الليل

الدنيا تصِن

وحفيف قدميك

في الخاطر

دجَّ

يا رضيانه

وعافيه عَلَي.

يامفقوده

وماليه عيني.

العالم مات

والفرح اتفات

لكنك راكزه

وصوتك حي.

من برد الليل

متغطي بتوبك

اتنفَّس وهجك

والقَلُب اتدفِّا.

أتذكر سفرك

ونَفَس الكون

الجانا مكفَّن

ونام في محفّه

من سفرك

مرَّ الحول الاول

والزمن الاسود

دوَّر ولفَّ

ولا جرحك نام

لا صوتك صام

لا وجعك خفَّ

لا جرحك نام

لا صوتك صام

لا وجعك خفَّ

15/2/1991م

ونواصل ،،،

من طرف وليد علي الجمعة يونيو 06, 2008 8:48 am

المنادي

جانا المنادى مع الفَجُر

قال لينا ياليومكم رِضِع لون السواد

وعيشكم خِرِب عَدَّم قناديلُه الجراد

وعيون حريمكم بالسهاد أتكَحّلَن

وشرف أرِضكُم بات سنين فوق المزاد

وضغاركم الباتو القَوَا

ما ضاقوا غير طعم الرماد

وحِلِم حياتكم

كان رجوع زولاً عزيز قاسى البعاد

فارسنا عاد

فارِسنا عاد

فارِسنا عاد

وفِرحَت إرِضْنَا بعزتها

فرح الجميلة الطال سهادها وحسرتها

وفكّت تياب عُمر الحَداد

يوم دخلتها.

أحى عليك يا ليل مشى

وعد من جديد

شَبّك عِقِد قيد الحديد

فوق القَدَم

وقال للشمس يومك سَجَم

وشَرَّ السّواد فوق الأرِض

ومشّانا فوق درب النّدم.

بَرْضَك مشيت ياليل غَصِب

فوق الجَمُر

بَرْقَعْنَا توبك بالرُصَاص

وهتفنا فى يوم الخلاص

وعْرِفْنَا كيف بِدّى الصّبرُ

ورقصنا فوق سَدْرِك فَجُر

حتى النِعِّس جوَّه القَبُر

نَفَض التُراب

وقال: يا شمس مرحب حباب

مرحب حباب

مرحب حباب 1964م

ونواصل ،،،

من طرف وليد علي السبت يونيو 07, 2008 5:10 pm

صحوة

الآن

تصيرُ المأساةُ لدىّ

بلا جذرٍ

وبلا تفنينٍ

أو عقده.

أتبرأُ عن شجنى

الآنَ

امزقُ كلَ اغانى

التيهِ

وأرقصُ

فى وجهِ الاعصارِ

كأنّى ((زوربا))

انتظرى

لا شىء يموتُ

الآن

لا شىء

يضيعُ الآن.

لن اتخلقَ

عن أحزانى

وعن أشواكِ

حصادِ الغربة

لن أحكى

تاريخ حياتى

مرات أخرى.

تلك تفاصيل’’ ميتة’’

وتفاهات’’ صغرى

الآن الحاضرُ يصبحُ

تاريخى

والفعلُ يكون الثورة.

مارس- 1977- فرانكفورت

..::

ونواصل ،،،

من طرف وليد علي الخميس يونيو 19, 2008 3:18 pm

عناق

سوفَ تهبطينَ

ليلة

ودونما عناءَ

فوقَ جسرِ ساعدىَّ

تنشرين ذلك العبيرَ

فوق غابةِ المسامْ.

تلمسينَ ذروةَ الحنينِ

فى ارتعاشةٍ تجيشُ

من أصابعِ الكلامْ.

ترقصينَ مثلَ نجمةٍ

تطيرُ بالنبيذِ

فوق شُرفةِ الظلامْ.

امدرمان- يوليو 1994م

من طرف crash السبت يونيو 28, 2008 11:11 pm

أيا مغبون ... أيا مجنون ...

صباحك شين أيا مغبون

مكر شجنك

سرق كحل السمح في العين

ترا الوطن الشرب روحك ضهب في لفة التاريخ

كبر ضيقك كبر ضيقك

صبح باقي المسافه مسيخ

أيا مغبون أيا مجنون

تقوم من ضيقك الهلكان

تبارز غابة الأحزان

تدب في الروح

حروف فكره

تفكر في صباح بكره

روائع هاشم صديق

روائع هاشم صديق

كلام للحلوة

زول بحبك

رد: روائع هاشم صديق

حروف إسمك

رد: روائع هاشم صديق

بريق الماس

وجود

سحر الهوى

ميلاد

رد: روائع هاشم صديق

الملحمة

عناق

رد: روائع هاشم صديق

هذا المساء

الإختيار

وصف السمحة

أتراح الحول الأول

المنادي

صحوة

عناق

رد: روائع هاشم صديق