من قصائد أهلنا الجعليين

من طرف الوليد الأحد مارس 15, 2009 7:15 pm

شميس المغرب الممْحوق... تميل فوق وشّك المحْروق...
تبين صُفْرَة سنيناتَك... يبين ضُل الكلام مقْلوب...
تمِيل يا صالح الأيام... ولا عاشرتَ هِدْماً زين...
ولا حتّيت تُراب السوق... تَفضّل...
تفضّل يا حفيف الضُل... ورُش جرجيرَك البايِّت...
وعِد ليمونك الفضّل... وكوِّم حُزنك الباير...
وبيع من غير تشاوِر زول... تواريخ دمّك الفاير...
وتفرُش فى الضُحَى الأعلى... تبيع سأم العُمُر كيمان...
ولا لا فتات...
ولا أوزان...
لا أتْمَان...
تَشِد ترْكَب قفَا الأيام... زَهضج خيلَك يِلَد تيمان...
فرس شوقَك دوام مسْبوق... تميل يا صالح الأحلام...
أهو القدَّامك البتبيعو... أشواق الصبا الأيتام...
وبرْضَك ما بْتبيع لى زول... أسف ربيّتُو فوق كتفك...
ولا عشقاً شْبِع أوهام... أهى الطاحونَهْ يا صالح...
أهو السوق الصبِح ألغام... تفضّل ..يا خفيف الضُل...
ورشْرِش صبرَك الناير... وارفَع صوتَك الحنضل...
وألعن ما يهمّك زول... أبوك يا سوق ، سليل الغم...
أبو الطوريَّهْ والمنجَل... وخال الرّجْلَهْ عم الدنيا جِد الفِجْلَهْ والفِلْفِل...
وشَكْل القُفَهْ والكرتونَهْ والجردَل... والعَن ما يفوتَك زول...
من الشارين من البايعين... وجِنْس البِرضَى والبزَعَل...
واشْتُم ياخى أيه فضّل؟... أيه يحصل؟ وهل تقبل؟...
تميل يا صالح النجمات... مع القمر الخصي واهبَل...
مِتين يا صالح الآمال... تميل ترقُص وتِتْعدَّل...
واضحك لا يشيلك هم... على النيل الصبح مَبْول...
صَحِي الأمواج بتتْبهدَل… صحِي الأمواج بتِتْبدَل؟…
!وبرضو سُعاد حتتْحوّل؟... لا يُمْكِن...
دى شمس الضُحى الأعلى... ومشيَهْ حنينَهْ تحت الضُل...
وتكْيَهْ طريَهْ فوق رملَهْ... دى أحلام جاريَهْ مُنْبهْلَهْ...
وما مًمْكن تقيف إلاّ... وليد العُمدهْ يلْعَب بي...
يدرْدِق فى الحرير كرْشو... يعاين فى النِّعال وَشِّو...
ويقْدِل فى الفريق تمساح... ينادى سُعاد...
تَلِم الكون تحت ضُل الضُحى البوّاح... تصوّر يا خفيف الضُل...
دا عِندو الهمسَهْ عِندو الغمْزَهْ عندو اللمْسَهْ…
أمر مُبَاح...
ونقْطَع من لحمْنَا الحي... ونقْعُد فوق شحمْنا السَّاح...
ونهتف نحنا مشويّين ومقليّين... دَا يا عُمدتنا ياهو الصاح...
وياهو الصاح...
وياهو الصاح...
أيا عِزَّة نَفِس برَكَت... متين بتسِّوى لينا جناح...
واشيلك يا سعاد وامْرُق... من الزمن الدّنى ونبّاح...
واشيلك يا سعاد وامرق... من الزمن الدنى ونباح...
والعمدهْ صاح... يا ولد... يا إنتَ يا صالح...

تعال شِد الحُمار... وانْدَه سُعاد...
شِد الحُمار واندَه سُعاد… ده قليل على يا عُمده فى هذا الصباح...
والعمدهْ صاح... أندَه سُ ع اد ..شِد ال حُ م ار...
وا فرحَة الحُب المطرّز بالمراسيل... والغُبار... يا دَه السَماح...
دَه كتير عليْ يا عُمدهْ فى هذا الصباح...
شِد الحمار وانده سعاد... يا فرحتك يا ود قِنِعْنَا...
ما بِهِم شَدْ الحُمار... إذا نهايتو تشوف سُعاد...
يا ده السَماح... أدّينى بس يا عُمدهْ بس... يومين صباح...
وغروب طويــــــل... أقْدَر ألمِلْم فيها عفَش الروح...
واشد عصب المسافَهْ... الواقفَهْ... بينى وبين سعاد...
ادُق يا عُمدهْ بينى وبين حِماك... أوتاد...
وارقُد فى ضواحى السُوق... وأحلَم والعمر مشنوق...
تجينى بلاد... أبيع فيها الفَضَل من شوق... تطوفْنى بلاد...
أغيِّر فيها شكل القُفَهْ... والأسياد... وادِّينى بس يا عمدَهْ بس...
يومين نهار مع ليل طويل... أقْدَر أغيِّر فيها طعم البوح...
واقولِك يا سُعاد... سُعاد ليمون... سُعاد نعْناع...
حكايَة ليل... على درب الهوى الضَيّاع... سُعاد ميعاد...
مجاعَهْ وزاد... على درْب الهوى الجوَّاع... واقولِك يا سعاد…
يا دَه السماح...ايا عِزَة نِفس برَكَت... متين بنْسوِّى لينا جناح...
واشيِلك يا سُعاد...

وامْرُق...

من الزمن الدَّني...
ونبَّاح...

من طرف ابو لين الإثنين مارس 16, 2009 9:02 pm

والله يا ولّى النبرة الجعلية واضحة
صالح اكيد مضايق بس ما عندو حيلة غير اسمع واتصبر

وفى النهاية وليد العمدة ما بتطال

وليد العُمدهْ يلْعَب بي...
يدرْدِق فى الحرير كرْشو... يعاين فى النِّعال وَشِّو...
ويقْدِل فى الفريق تمساح... ينادى سُعاد...
تَلِم الكون تحت ضُل الضُحى البوّاح... تصوّر يا خفيف الضُل...
دا عِندو الهمسَهْ عِندو الغمْزَهْ عندو اللمْسَهْ…
أمر مُبَاح...

من طرف ابوفدوى الأربعاء مايو 13, 2009 2:54 pm

هى دى قصايد اهلنا الجعليين والله
عمر الطيب الدوش
بس المعلومة الداير اعرفها
عمر دا جعلى ؟

من طرف ابوفدوى الأربعاء مايو 13, 2009 2:58 pm

هى دى قصايد اهلنا الجعليين والله
عمر الطيب الدوش دا ياربى ...
بس المعلومة الداير اعرفها
عمر دا جعلى ؟

من طرف ابوفدوى الأربعاء مايو 13, 2009 3:02 pm

دايرنك ياولى
تتحفنا برائعة ابراهيم العبادى
حمد ودكين وطه الضرير

من طرف abukareem الإثنين مايو 25, 2009 6:29 pm

المقتطف هو الجزء الثالث من قصيدة "ضل الضحي" للشاعر عمر الطيب الدوش و التي اشتهرت باسم "سعاد" و يجئ تحت اسم "صالح ود قنعنا الخدرجي"

و يا ابو فدوي عمر الدوش جعلي مأصل و هو من مواليد شندي سنة 1948
له الكثير من الاغاني اشهرها الود - الحزن القديم - بناديها محمد وردي
سحابات الهموم ابو السيد
سعاد الكابلي

وفي رائي المتواضع فان قصيدة ضل الضحي هي من اجمل القصائد السودانية ان لم تكن اجملها علي الاطلاق
لك الشكر ود جابر و اهنئك علي هذا الاختيار الرائع

من قصائد أهلنا الجعليين

من قصائد أهلنا الجعليين

رد: من قصائد أهلنا الجعليين

رد: من قصائد أهلنا الجعليين

رد: من قصائد أهلنا الجعليين

رد: من قصائد أهلنا الجعليين

رد: من قصائد أهلنا الجعليين